Уэрэд 75 - ХъыбарыфӀыр. ЩӀэдзапӀэр. Уэрэд ЛъапӀэхэр

75-нэ Уэрэд ТекӀуэныгъэ къэзыхь Тхьэр

¹ УэрэдыӀуэхэмрэ пшынауэхэмрэ я пашэм папщӀэ. Бзэпс зэрылъ пшынэкӀэ дожьу. Асаф и уэрэд. Уэрэд

² Тхьэр щащӀэ Иудэ хэкум; Израилым щагъэлъапӀэ Абы и цӀэр.

³ Абы и псэупӀэр Щалем щигъэуващ, и унэр – Цион Ӏуащхьэм.

⁴ Шабзэшэ псынщӀэхэр, джатэр, мэӀур, къинэмыщӀ Ӏэщэхэр Абы щикъутащ абдежым.

⁵ Уэ сыту уин, уи щӀыхьышхуэр зэи мыкӀуэдыж бгы лъагэхэм нэхърэ нэхъ инщ.

⁶ ЗауэлӀ бланэхэм трахащ я Ӏэщэр, къэмыушыжыну жеящ, я Ӏэхэр къаӀэтын ялъэкӀыркъым зауэлӀхэм.

⁷ Уэ уащыхуэгубжьым, Екъуб и Тхьэ, шыри шым тесри хэщӀащ.

⁸ Ущынагъуэщ Уэ; Уи губжьыгъуэм уи пащхьэ итын хэт лъэкӀын?

⁹ Уафэм къикӀыу, Уэ уи хьэкум цӀыхухэм ебгъэщӀащ; щӀыр къаскӀэри, Ӏэсэ хъуащ –

¹⁰ щӀым егъэзыгъэу тет псори къригъэлын папщӀэ, хьэкум ищӀэну Тхьэр къыщежьэм.

¹¹ ЦӀыхум я губжьыр Уэ щӀыхь пхуэхъужынщ: губжьым и кӀэкъинэр Уэ бгъэӀэсэнщ.

¹² ЗэгурыӀуэныгъэ дэфщӀ Тхьэм, Зиусхьэным, фи Тхьэм, ефта псалъэр вгъэзащӀэ; Ар къэзухъуреихьхэм тыгъэхэр хурехь шынагъуэшхуэр зыхуаӀэм.

¹³ Абы пщыхэр егъэӀэсэ, пащтыхьышхуэхэри егъэшынэ.