Уэрэд 74 - ХъыбарыфӀыр. ЩӀэдзапӀэр. Уэрэд ЛъапӀэхэр

74-нэ Уэрэд Тхьэуэ хьэкумыщӀэр

¹ УэрэдыӀуэхэмрэ пшынауэхэмрэ я пашэм папщӀэ. «СумыгъэкӀуэд» уэрэдым и макъамэр щӀэлъу. Асаф и уэрэд. Уэрэд

² ЩӀыхь пхудощӀ Уэ, ди Тхьэ, щыпкъагъэкӀэ дыпщотхъу. Уи инагъри уи Ӏуэху щӀагъуэхэри доӀуатэ.

³ «ПӀалъэ згъэувынщи, хьэкум ятесщӀыхьынщ Сэ щыпкъагъэкӀэ.

⁴ ЩӀыгур мэхъей, мэкӀэзыз абы тет псори; абы и пкъохэр сэ согъэбыдэ».

⁵ ЯжызоӀэ зыкъызыфӀэщӀыжхэм: «ФыкъызыфӀэмыщӀыж»; ЯжызоӀэ цӀыху бзаджэхэми: «Фи гуащӀэ ину къызыфӀэвмыгъэщӀ.

⁶ Фи гуащӀэ ин дыдэу къызыфӀэвмыгъэщӀ, фыщыкӀауэ фымыпсалъэ».

⁷ Сыту жыпӀэмэ цӀыхур зыӀэтыр къыздикӀыр къуэкӀыпӀэркъым, къухьэпӀэркъым, губгъуэ нэщӀыркъым, –

⁸ Тхьэращ хьэкумыр зыщӀэр: зыр егъэлъахъшэ, адрейр хеӀэтыкӀ.

⁹ Сыту жыпӀэмэ Ӏэгубжьэр Зиусхьэным ӀэщӀэтщ, абы санэр къыщокъуалъэ, изыбзэу зэхэгъэкӀухьауэ; абы итыр къахурегъахъуэ. Иужьрей дыдэ ткӀуэпсым нэсу, цӀыху бзаджэхэр абы ефэнщ псори?

¹⁰ Сэ игъащӀэкӀэ яхуэсӀуэтэнщ Екъуб и Тхьэм и щӀыхьыр, щӀыхь хуэсщӀынщ уэрэдкӀэ.

¹¹ БзаджащӀэхэм я гуащӀэр Тхьэм икъутэнщ, Тхьэм щыпкъагъэ хузиӀэр лъагэу иӀэтынщ.