Уэрэд 71 - ХъыбарыфӀыр. ЩӀэдзапӀэр. Уэрэд ЛъапӀэхэр

71-нэ Уэрэд Пащтыхьым папщӀэ тхьэлъэӀу

¹ Уэ, си Тхьэ! Ди пащтыхьым хьэкумщӀыкӀэ егъащӀэ, Уи щыпкъагъэр игу илъхьэ.

² Уи лъэпкъым – щыпкъагъэкӀэ, тхьэмыщкӀэу уиӀэхэм – захуагъэкӀэ уадызекӀуэурэ, тепщэныгъэр иреӀэ.

³ ЩыпкъагъэкӀэ псэу лъэпкъхэм бгыхэмрэ Ӏуащхьэхэмрэ берычэтыр къахурехь.

⁴ ЦӀыху лъэпкъым тхьэмыщкӀэу хэтхэм я Ӏуэху кърехъумэ, кърегъэл зылъэмыкӀхэр, цӀыхухэр егъэзыгъэ зыщӀхэр зэхрекъутэ.

⁵ Дыгъэмрэ мазэмрэ щыӀэху, урегъэлъапӀэ уи цӀыхухэм – щӀэблэхэр зэкӀэлъыкӀуэу.

⁶ ПаупщӀа мэкъупӀэр къигъэкӀыжу, уэру къытешхэурэ, щӀыгур зыгъэщӀытэж уэшхым хуэдэ ди пащтыхьыр ирехъу.

⁷ Пащтыхьым тетыгъуэр ӀэщӀэлъыху, зреуфэбгъу захуагъэм, иребагъуэ мамырыгъэр, мазэр щыӀэху.

⁸ Хым щегъэжьауэ хым нэсыху, Псым щегъэжьауэ щӀы гъунэм нэсу, абы тетыгъуэр иреӀэ.

⁹ Губгъуэ нэщӀым ис цӀыхухэм бгъэгукӀэ зыщрадзых абы и пащхьэм, сабэм иребзей и бийхэр.

¹⁰ ХытӀыгухэм, Таршышым я пащтыхьхэм абы къуэды кърырет. Шэбэмрэ Сэбэмрэ я пащтыхьхэм тыгъэ къыхурехь.

¹¹ Пащтыхь псоми щхьэщэ къыхурыращӀ абы; хурелажьэ хамэ лъэпкъхэр.

¹² Сыту жыпӀэмэ къулейсызи, тхьэмыщкӀи, дэӀэпыкъуэгъу зимыӀи, елъэӀу псори гугъуехьым къыхешыж абы.

¹³ Игу ящӀогъу къарууншэхэм, егъэзыгъэ хъуахэм, къулейсызхэм я псэр кърегъэл.

¹⁴ Егъэзыгъэ цӀыхухэр залымыгъэкӀэ ягъэпсэухэр яӀэщӀехыж; и цӀыхухэм я псэхэр абы дежкӀэ лъапӀэщ.

¹⁵ Пащтыхьыр бэрэ ирепсэу, Щэбэ и дыщэм щыщ абы кърырет! ФылъаӀуэ зэпымыууэ Тхьэм и нэфӀ махуэ енкӀэ абы къыщыхуэну.

¹⁶ Щребагъуэ хэгъэгум гъавэр Ӏуащхьэхэми гъэр бэв щрехъу; Ливан Ӏуащхьэм зэрыщыбагъуэм хуэдэу, бэв ирехъу. ЩӀым удзыр зэрыщыуэрым хуэдэу, къалэхэм цӀыхур щребагъуэ;

¹⁷ абы и цӀэр игъащӀэкӀэ щреӀэ, иремыкӀуэд дыгъэр щыӀэху. Лъэпкъхэм абы и хьэтыркӀэ Тхьэм и нэфӀ къащрехуэ. ЦӀыху лъэпкъ псоми Ар гъуэгу махуэ теувауэ жреӀэ.

¹⁸ ЩӀыхь хуэфщӀ Израилым и Тхьэу Зиусхьэным, телъыджащэхэр зылэжь закъуэм.

¹⁹ ЩӀыхьышхуэ зиӀэ и цӀэм лъытэныгъэ хурещӀ игъащӀэкӀэ. Абы и щӀыхьыр щӀыгум дэнэкӀи тез щрехъу. Ӏэмин! Ӏэмин!

²⁰ Ишай и къуэ Даут и тхьэлъэӀухэр иухащ.