Уэрэд 70 - ХъыбарыфӀыр. ЩӀэдзапӀэр. Уэрэд ЛъапӀэхэр

70-нэ Уэрэд ЛӀыжьым и тхьэлъэӀу

¹ Уэ, ди Тхьэ, щхьэегъэзыпӀэ узощӀ, емыкӀу къызомыгъэхь игъащӀэкӀэ!

² Уэ щыпкъагъэу уиӀэмкӀэ хьэзабым сыхэшыжи, сыкъегъэл. Уи тхьэкӀумэ къысхуэгъази, хьэзабым сыхэшыж.

³ Сыкъэзыхъумэ мывэбг быдапӀэ лъэщ къысхуэхъу, сыту жыпӀэмэ Уэращ егъэзыпӀэуи быдапӀэуи сиӀэр.

⁴ Си Тхьэ! ЦӀыху бзаджэхэм, мызахуэхэм, залымхэм саӀэщӀэх.

⁵ Сыту жыпӀэмэ Уэращ, Зиусхьэн, сызщыгугъыр, си цӀыкӀугъуэм щыублауэ си дзыхьщӀэгъур.

⁶ Сыкъыщалъхуам щегъэжьауэ, Уэращ сэ къысщӀэӀэр; си анэ и ныбэ сызэрырищӀэ лъандэрэ укъысхуэгумащӀэщ. Уэ щӀыхьу пхуэсщӀыр зэпыункъым.

⁷ Сэ бэм щапхъэ сахуэхъуащ; Уэ щхьэегъэзыпӀэ щыпкъэ усхуэхъуащ.

⁸ Си жьэкӀэ сыпщытхъу зэпытщ, Уи щӀыхьыр зэпымыууэ соӀуатэ махуэ енкӀэ.

⁹ Си жьыхъугъуэм сыхыфӀомыдзэж. Си гуащӀэм кӀэрич щыхъукӀэ си закъуэу сыкъыумыгъанэ.

¹⁰ Сыту жыпӀэмэ псалъэ гуауэхэр сэр папщӀэ яӀуатэ си бийхэм, си псэм къещэхэр зэрогъэӀущыж.

¹¹ «Ар Тхьэм къибгынащ, – къысхужаӀэ, – фылъежьи, къэвубыд, абы къыщхьэщыжьын иӀэкъым».

¹² Си Тхьэ! Спэжыжьэ зумыщӀ. ДэӀэпыкъуэгъу укъысхуэхъуну псынщӀэу къэс си деж, си Тхьэ.

¹³ ЕмыкӀу кърырехь, ирекӀуэд бий зыкъысхуэзыщӀхэр; сызыгъэунэхуну хуейхэм я напэ трекӀ, мыгъуэ ирехъу!

¹⁴ Сыт щыгъуи сыпщыгугъынущ Уэ, щӀыхьу пхуэсщӀым хэзгъэхъуэнщ.

¹⁵ Махуэ къэси сӀуэтэнщ сэ Уэ пхэлъ щыпкъагъэри, дымыкӀуэду дыкъебгъэлын папщӀэ къытхуэпщӀахэри, я бжыгъэ плъытэн плъэмыкӀынуми.

¹⁶ Уэ, Зиусхьэну ди Тхьэ, уи унэшхуэм сыщӀыхьэнщ, Уи ӀэщӀагъэшхуэхэм, уи щыпкъагъэм я щӀыхьэр дэни щысӀуэтэнщ сэ.

¹⁷ Си цӀыкӀугъуэм щегъэжьауэ сыбоущий Уэ, ди Тхьэ, уи ӀэщӀагъэ телъыджэхэр иджыри къэс соӀуатэ.

¹⁸ Жьы сыхъуху, си щхьэр тхъуху, сумыбгынэ Уэ, ди Тхьэ, мы щӀэблэми къыкӀэлъыкӀуэну щӀэблэхэми уи гуащӀэмрэ лъэкӀыныгъэ ину уиӀэмрэ зыхуэдэр яхуэсӀуэтэху.

¹⁹ ГуащӀэу пхэлъри щыпкъагъэу уиӀэри уафэхэм нэсащ, ди Тхьэ. Ӏуэхугъуэшхуэхэр зэфӀэпхащ Уэ; Ди Тхьэ, хэт хъун Уэ пхуэдэ?

²⁰ Шэчыгъуейуэ, тхьэмыщкӀагъэ куэдыр Уэ къысхуэбгъэкӀуащ сэ, ауэ щӀэрыщӀэу сыкъэбгъэпсэужурэ, щӀым и кууупӀэм сыкъыщӀэпшыжынщ.

²¹ СыпӀэтынщ Уэ лъагэу, гупсэхугъуэ къызэптыжынщ.

²² ПшынэкӀэ сыдежъууэ, Уэ щӀыхь пхуэсщӀынщ, щыпкъагъэу къытхууиӀэм и щӀыхь, си Тхьэ, шыкӀэпшынэм уи щӀыхь уэрэд сэ къизгъэкӀынщ. Израилым и Тхьэ лъапӀэ!

²³ Макъ лъэщкӀэ уэрэд пхужысӀэ щыхъукӀэ, си Ӏупэр гуфӀэм зэлъещтэ, си псэу къебгъэлари аращ.

²⁴ Бзэуэ сӀурылъым махуэ енкӀэ уи щыпкъагъэр иӀуэтэнщ, сыту жыпӀэмэ мыхъун къызащӀэн зыфӀэигъуэхэм емыкӀу къатехуэурэ, я напэр текӀащ абыхэм.