Уэрэд 7 - ХъыбарыфӀыр. ЩӀэдзапӀэр. Уэрэд ЛъапӀэхэр

7-нэ Уэрэд Захуагъэм ехьэлӀа тхьэлъэӀу

¹ Биниамин лӀакъуэм щыщ Куш и Ӏуэху ехьэлӀауэ, Зиусхьэным зыхуигъазэу, Даут иуса гъыбзэ

² Уэ, Зиусхьэну си Тхьэ! ЩхьэегъэзыпӀэкӀэ зыныпхузогъазэ сэ; сыкъезыхуэкӀхэм псоми сащыхъумэ, саӀэщӀэх;

³ дэӀэпыкъуэгъу къысхуэхъун щызимыӀэм деж аслъэным хуэдэу къызжьэхэпхъуэхэм сызэралъафэурэ, сызэхомыгъэшхыхь.

⁴ Зиусхьэн, си Тхьэ! Зыгуэр сӀэщӀэщӀамэ, си Ӏэхэм ящӀэм захуагъэ хэмылъмэ,

⁵ мамыру къыздэпсэуам бзаджагъэкӀэ сыдызекӀуамэ, лажьэ зимыӀэ сэ бий къысхуэхъуар схъунщӀамэ, –

⁶ абы щыгъуэм си псэм къещэу бийр къыслърежьэ, къысщӀрехьэ, си гъащӀэри ятӀэм хрырекухь, пщӀэуэ сиӀэри сабэ ирырещӀ.

⁷ ЗыкъэӀэт, Зиусхьэн, уи губжьым ухэту, си бийхэм я губжьышхуэм сыщыхъумэ, си хьэтыркӀэ зыкъэгъэхъей – хьэкум ятепщӀыхьыну бухэсащ.

⁸ ЦӀыху куэд дыдэ кърыроувэкӀ; абыхэм я щхьэкӀэ лъагэу къиувэ.

⁹ Зиусхьэным цӀыху лъэпкъхэм хьэкум ятрещӀыхь. Зиусхьэн, си щыпкъагъэрэ си къабзагъэкӀэ къыстещӀыхь хьэкум.

¹⁰ БзаджащӀэхэм я гужьгъэжьыр еудых, щыпкъагъэ зиӀэр гъэбыдэ: Уэращ цӀыхухэм ягури я фэри зыгъэунэхур, Тхьэ захуэ!

¹¹ ЗигукӀэ щыпкъагъэ зиӀэхэр мыкӀуэду къезыгъэл Тхьэращ сэ сыкъэзыхъумэ мэӀур.

¹² Тхьэр хьэкумыщӀ захуэщ, махуэ къэси ткӀийуэ ер егъэкъуаншэ Тхьэм.

¹³ И гуэныхьхэм зыгуэр хущӀемыгъуэжмэ, Тхьэм и джатэр щӀелъыкӀ, и шабзэр еузэдри бзэпсыр ешэщӀ;

¹⁴ ажал Ӏэщэхэр хуегъэхьэзыр, уалыгъуэн ещӀ и шабзэшэхэр.

¹⁵ ЦӀыху Ӏейм и гум бзаджагъэм лъабжьэ щещӀри, гужьгъэжьыр и фэ хэлъщи, пцӀыр абы къелъху.

¹⁶ Мащэ куур етӀ, итӀа мащэм езыр йохуэж.

¹⁷ Абы и гужьгъэжьыр езым и щхьэм къылъосыж, и бзаджагъэр и щхьэм къытохуэж.

¹⁸ Зиусхьэным и щыпкъагъэм папщӀэ щӀыхь хузощӀ, Псоми я нэхъ Лъагэу Зиусхьэным и цӀэм щӀыхь уэрэд хужызоӀэ.