Уэрэд 68 - ХъыбарыфӀыр. ЩӀэдзапӀэр. Уэрэд ЛъапӀэхэр

68-нэ Уэрэд Гугъуехь зрагъэшэчам и тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. «Шошаним» макъамэр щӀэлъу. Даут и уэрэд

² Ди Тхьэ, сыкъегъэл сымыкӀуэду – псыр си къурмэкъейм къыщӀэуащи.

³ Шэд куум сыхэнащ сэ, сызытеувэни симыӀэу, архъуанэм сизэрыхьащ сэ, срехьэжьэ псыдзэшхуэм.

⁴ Сыгуоуурэ, гуащӀаджэ сыхуащ, игъущӀыкӀащ си джийр; си Тхьэ, сыпхуэлӀэу сыппэплъэурэ, си нэр ешащ.

⁵ Лажьэ симыӀэу, си жагъуэгъухэр щхьэцу стетым нэхъыбэ хъуащ; сагъэкӀуэдмэ, яфӀэигъуэу, пцӀыкӀэ сыкъэзыувыхьхэм гуащӀэ яӀэщ; естыжын хуей абыхэм къатезмыхар?

⁶ Ди Тхьэ! Уэ уощӀэ сызэрыакъылыншэр, мыхъуну сщӀахэр УэркӀэ щэхукъым.

⁷ Зиусхьэну лъэкӀыныгъэ псори зиӀэ Тхьэ, Уэ къыпщыгугъ псоми я напэ тремыкӀ. Уэ, Израилым и Тхьэм, зыкъыпхуэзыгъазэхэм сэркӀэ емыкӀу къремыхь;

⁸ сыту жыпӀэмэ Уэр папщӀэ сэ сауб, напэншагъэр нэкӀу Ӏупхъуэ къысхуащӀ.

⁹ Си къуэшхэмкӀэ хамэ сыхъуащ сэ, си анэм и къуэхэм сащымыщыжу.

¹⁰ Сыту жыпӀэмэ уи унэ сызэрыщӀэхъуэпсым сеух сэ, Уэ узыубхэм я убэ псалъэхэр сэ къыстехуэжащ.

¹¹ Сэ нэщӀ сисурэ, сызыгъэикӀэм саубащ;

¹² щыгъуэ щыгъынхэр щыщыстӀагъэм, къысщыдыхьэшхыу хъыбар зэрахьащ.

¹³ Сэ къыстопсэлъыхь къалэ куэбжэм Ӏусхэр, ЕфакӀуэм я уэрэдым сыхалъхьэ.

¹⁴ Сэ си тхьэлъэӀукӀэ, Зиусхьэн, зыныпхузогъазэ; Уэ игъуэу плъытэ уахътэм, си Тхьэ, Уи лъагъуныгъэ мыкӀуэдыжым и хьэтыркӀэ сыкъызэхэх. Уэ уи дэӀэпыкъуэгъу щыпкъэкӀэ

¹⁵ шэдым сыхимыубыдэу сыкъыхэшыж: си жагъуэгъухэм псы кууми сакъыщыӀэщӀэх.

¹⁶ Псыдзэшхуэм сромыгъэхьэжьэ, псы куум сыщӀумыгъэлъафэ, хьэдрыхэ и жьэ ущӀам сыжьэдумыгъахуэ.

¹⁷ Жэуап къызэт, Зиусхьэн, сыту жыпӀэмэ уи лъагъуныгъэр мыкӀуэдыжыр фӀыщ. Зыкъысхуэгъазэ, уи фӀыщӀагъэ бэ дыдэщ.

¹⁸ Уи ӀурыщӀэм уи нэгу щумыгъэпщкӀу, гузэвэгъум сыхэтщ, жэуап къызэт псынщӀэӀуэу.

¹⁹ Спэблагъэ зыкъэщӀ, си щхьэ щэхуж, сыкъегъэл, бийр си куэдщ.

²⁰ Уэ уощӀэ сызэраубыр, си напэ зэрытрахыр, ауан сызэращӀыр; си бийхэр псори уи пащхьэ итщ.

²¹ Си гур иухащ убэным, слъэкӀыжӀаркъым; гущӀэгъу къысхуащӀыным сыпэплъащ, ауэ къысхуащӀакъым; сызыгъэгупсэхуным сыпэплъащ, ауэ ари згъуэтыркъым.

²² Зэзыр къызатащ гъуэмылэу, дыджыпсым срагъэфащ псыхуэлӀэм сыщиубыдым.

²³ Я шхыныр лъахъэ яхурехъу абыхэм, я къурмэн ефэ-ешхэр убыдыпӀэу къахущӀрекӀ.

²⁴ Я нэхэр иреункӀыфӀ, ялъагъужынӀа ялъэмыкӀыу; я лъакъуэхэр ирекӀэзыз зэпымыууэ.

²⁵ ЯтеунащӀэ уи губжь Уэ абыхэм, уи губжьышхуэм и мафӀэм хегъэубыдэ ахэр.

²⁶ Я псэупӀэхэр нэщӀ ирехъу, я шэтырхэм щыпсэун щремыӀэ,

²⁷ сыту жыпӀэмэ Уэ узэуар абыхэм зэрахуэ иджыри Уэ ебдза уӀэгъэм зыхигъэт гугъуехьым хагъахъуэ.

²⁸ Абыхэм я хабзэншагъэхэр яхуэлъытэ чэзу-чэзууэ, мыкӀуэду къебгъэлыным щремыгугъ игъащӀэкӀэ.

²⁹ Абыхэм я цӀэхэр хрекӀуэдыкӀыж гъащӀэ зиӀэнухэм я тхылъым Тхьэм щыпкъагъэ хузиӀэхэм ирыремытхэ.

³⁰ СекӀэкӀуащ сэ, гузэвэгъуэм сыхэтщ; Уи дэӀэпыкъуэгъукӀэ, ди Тхьэ, сыкъызэфӀэгъэувэж.

³¹ Тхьэм щӀыхь хуэсщӀынщ уэрэдкӀэ, щӀыхь хуэсщӀурэ, зэрыиныр езгъэщӀэнщ цӀыхум.

³² Ар Зиусхьэным игу нэхъ ирихьынщ вы нэхъри, бжьакъуэ зытету лъабжьэ зиӀэ танэм нэхъри.

³³ Егъэзыгъэ хъуахэм ар ялъагъунщи, гуфӀэжынщ. Тхьэм лъыхъуэхэм ягу къихьэжынщ.

³⁴ Сыту жипӀэмэ Зиусхьэным тхьэмыщкӀэхэм я макъ зэхех, и цӀыхуу Ӏэпхлъэпх ящӀахэм нэмыплъ яритыркъым.

³⁵ ЩӀыхь хурещӀ Абы уафэгухэми, щӀыгуми, хыхэми, абыхэм щыпсэу псоми.

³⁶ Сыту жыпӀэмэ Тхьэм Цион къалэр къихъумэнущ, зэтригъэувэжынущ Иудэ и къалэхэр; Тхьэм и цӀыхухэр а хэгъэгум иригъэтӀысхьэнущ; Ар абыхэм я Ӏыхьэ хъунущ.

³⁷ Тхьэм хуэӀурыщӀэхэм я щӀэблэм ей хъунщ а хэгъэгур, Тхьэм и цӀэр фӀыуэ зылъагъухэр абы итӀысхьэнщ.