Уэрэд 66 - ХъыбарыфӀыр. ЩӀэдзапӀэр. Уэрэд ЛъапӀэхэр

66-нэ Уэрэд Ӏуэныгъэ уэрэд

¹ УэрэдыӀуэхэмрэ пшынауэхэмрэ я пашэм папщӀэ. Бзэпс зэрылъ пшынэхэмкӀэ дежьууэ

² Ди Тхьэ, гущӀэгъу къытхуэщӀ, уи нэфӀ къытщыгъахуэ; уи нэгум и нэху къыттегъапсэ,

³ дунейм и цӀыхухэр уи гъуэгум нэӀуасэ хуэхъуну, гуащӀэ узэриӀэр цӀыху лъэпкъ псоми ящӀэну.

⁴ Ди Тхьэ, цӀыху лъэпкъхэм щӀыхь къыпхурещӀ, щӀыхь къыпхурещӀ цӀыху лъэпкъ псоми!

⁵ ИрегуфӀэ, щӀыхь уэрэд ирегъэӀу лъэпкъ мащӀэхэм! Сыту жыпӀэмэ цӀыху лъэпкъ псоми хьэкум захуэ ятыбощӀыхь Уэ, лъэпкъ мащӀэхэри уогъэӀурыщӀэ.

⁶ Ди Тхьэ, цӀыху лъэпкъхэм щӀыхь къыпхурещӀ, щӀыхь къыпхурещӀ цӀыху лъэпкъ псоми!

⁷ И лэжьыгъэ щӀыгум кърырет: Тхьэм и нэфӀ къытщрехуэ – ди Тхьэм!

⁸ Тхьэм и нэфӀ къытщрехуэ, щӀыгум дэнэкӀи щыпсэу цӀыхухэм Абы фӀэлӀыкӀ хурыреӀэ!