Уэрэд 65 - ХъыбарыфӀыр. ЩӀэдзапӀэр. Уэрэд ЛъапӀэхэр

65-нэ Уэрэд Тхьэм уелъэӀунымрэ щӀыхь хуэпщӀынымрэ я уэрэд

УэрэдыӀуэхэмрэ пшынауэхэмрэ я пашэм папщӀэ

¹ ГуфӀэгъуэ макъыр хуэфӀэт зэрыщӀыгуу.

² Абы и цӀэм хужыфӀэ щытхъу уэрэдыр. Лъытэныгъи щӀыхьи хуэфщӀ Абы.

³ ЖефӀэ Тхьэм: «Уи Ӏуэху щӀагъуэхэм лъэщу уагъэшынэ! ГуащӀэу Уэ пхэлъыр бэ дыдэщи, Уи бийхэр уи пащхьэ щохыщӀэ.

⁴ Щхьэщэ къыпхуащӀ зэрыщӀыгуу, пхужаӀэ щытхъу уэрэд, уи цӀэм уэрэд хужаӀэ».

⁵ ФыкъакӀуи, феплъ Тхьэм и ӀэщӀагъэхэм, Тхьэр – шынагъуэщ, Ӏуэхуу зэрихьэхэм цӀыхухэм я гур егъэкӀэзыз.

⁶ Хыр щӀыгу ищӀащ Абы; ЦӀыхур лъэсу зэпрыкӀащ псым, абы деж дигъэгуфӀащ.

⁷ ЛъэкӀыныгъэ ину иӀэмкӀэ Абы тетыгъуэр иӀыгъщ игъащӀэкӀэ; Абы и нэм хамэ лъэпкъхэр елъагъу, Ар кърамыдзэу зызыгъэкъайгъэхэм зыкъремыӀэт.

⁸ ЦӀыху лъэпкъхэм, ди Тхьэм щӀыхь хуащӀ, Абы и щӀыхь макъ зэхрех цӀыхухэм.

⁹ Ди псэр къригъэлащ Абы, псэухэм дыхэтыну, дигъэцӀэнтхъуакъым.

¹⁰ Дыбгъэунэхуащ уэ, ди Тхьэ, дыжьыным хуэдэу къабзэ дыпщӀащ.

¹¹ Уэ хъым дибгъэхуащ, ди дамэ хьэлъэхэр къытеплъхьащ Уэ,

¹² дебгъэулъэгуащ цӀыхухэм, псыми мафӀэми дыпхыкӀащ, Уэ абыхэм дыкъыхэпшыжри, гупсэхупӀэм дипшэжащ.

¹³ Къурмэн гъэсынхэр сщӀыну, уи унэшхуэм сынихьэнщ, псалъэу уэстар згъэпэжынщ –

¹⁴ гугъуехьым сыхэту си ӀупэкӀэ жысӀар, си жьэ къыжьэдэкӀар.

¹⁵ Былым гъэшхахэр къурмэн Уэ пхуэсщӀынщ, къурмэныпхъэ мэлым я Ӏугъуэ пхуэзгъэуурэ; выхэр, ажэхэр къурмэн пхуэсщӀынщ.

¹⁶ Тхьэм фӀэлӀыкӀ хузиӀэ псори фыкъакӀуи, федэӀу, Абы сэ къысхуищӀахэр фхуэсӀуэтэжынщ.

¹⁷ МакъышхуэкӀэ селъэӀуащ сэ Абы, и щӀыхьыр сӀэтащ си бзэкӀэ.

¹⁸ Си гум бзаджагъэ изгъэлъатэмэ, Зиусхьэным сызэхихынтэкъым.

¹⁹ Ауэ Тхьэм сызэхихащ, си лъэӀум и макъ къыщӀэдэӀуащ.

²⁰ ЩӀыхьыр ейщ Тхьэуэ си тхьэлъэӀухэм нэмыплъ къезымытам, зи лъагъуныгъэ мыкӀуэдыжым сыхэзымынам.