Уэрэд 64 - ХъыбарыфӀыр. ЩӀэдзапӀэр. Уэрэд ЛъапӀэхэр

64-нэ Уэрэд Тхьэм щӀыхьыр хуэфащэщ

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² Уэращ, ди Тхьэ, зыхуэфащэр Цион къалэм щӀыхь къыщыпхуащӀыну. Уэращ цӀыхухэм къуата псалъэр зыхуагъэщыпкъэжынур.

³ Уэращ къыхэзыхыр тхьэлъэӀур: цӀыху псори уи деж нэкӀуэнщ я гуэныхьхэм ябжь ятелъу.

⁴ Ди щыуагъэхэр хьэлъащэ къытхуэхъумэ, ахэр Уэ къытхуэгъэгъу.

⁵ Гъуэгу махуэ теуващ Уэ къыхэпхар, благъэ зыхуэпщӀауэ, уи пщӀантӀэм щыпсэунур! Уи унэм, уи унэшхуэ лъапӀэм и фӀыгъэхэмкӀэ зыдгъэтхъэжынщ.

⁶ Ӏуэхушхуэ щӀагъуэхэмкӀэ укъытпогъуэкӀ, текӀуэныгъэ къыдыбогъэхь, ди Тхьэ, ди КъегъэлакӀуэ, щӀыгум и къуапэ псоми щыпсэу цӀыхухэри, хы жыжьэхэм тетри Уэ къыпщогугъ.

⁷ Уи гуащӀэкӀэ бгъэуващ бгыхэр, лъэкӀыныгъэшхуэр уи фащэщ,

⁸ хыхэм я гъуахъуэ макъыр, хы уэрым и макъыр, къэбырсырурэ, цӀыху лъэпкъхэр уогъэӀэсэ.

⁹ ЩӀыгум и къуапэхэм щыпсэу цӀыхухэм ягъэщӀагъуэ уи Ӏуэху лъэщхэр. Дыгъэ къуэкӀыпӀэмкӀи дыгъэ къухьэпӀэмкӀи гуфӀэгъуэ макъышхуэ щыбогъэӀу.

¹⁰ Уэ щӀыгум ухуогумащӀэ, зыхуэныкъуэр ибогъэгъуэт, и мылъкум жумарту хыбогъахъуэ. Тхьэм и псыхъуэм псыр дэзщ; Гъавэ щыбогъэкӀ, апхуэдэу псори бгъэпсащи;

¹¹ уогъэнщӀ псыкӀэ вагъэмбэкъухэр, тыкъырышхуэхэр уогъэщащэ, ахэр уэшхкӀэ уогъэщабэ, абы игъэкӀхэм уи нэфӀ ящохуэ.

¹² Гъэм тыгъэфӀхэр хубогъэфащэ. Уэ узэрыхьэм гъавэр щобагъуэ;

¹³ къум нэщӀым и хъупӀэхэми къэкӀыгъэхэр къыщыхокӀ, гуфӀэгъуэм зэлъеубыд Ӏуащхьэхэр.

¹⁴ ХъупӀэхэр Ӏэщым яуфэбгъу, аузхэр ягъэнщӀ гуэдз хьэсэхэм; уэрэд жаӀэ, гуфӀэгъуэ макъыр яӀэт.