Уэрэд 63 - ХъыбарыфӀыр. ЩӀэдзапӀэр. Уэрэд ЛъапӀэхэр

63-нэ Уэрэд Тхьэм укъиухъумэным и тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² Си тхьэусыхэ макъ зэхэх Уэ, ди Тхьэ, си бийхэм сащошынэ – си псэр къегъэл.

³ СащыгъэпщкӀу мэхъаджэхэм я гухэлъхэм, бзаджащӀэхэм – я гухэлъ щэхухэм.

⁴ Джатэ хуэдэ жанщ я бзэр; зэфӀэдзащ я шабзэр – яутӀыпщын хьэзырщ я псалъэ дыджыр,

⁵ лажьэ зимыӀэм щэхуу еуэнхэу; ахэр йоуэ абы, мыӀэнкуну, шынэхэркъым.

⁶ Гухэлъ бзаджэкӀэ зэрогъэгушхуэ; ЗэрогъэӀущ лъахъэхэр ягъэпщкӀуну; жаӀэ: «Хэт зылъагъунур?»

⁷ Гухэлъ бзаджэхэр зэхалъхьэ абыхэм, къагупсыса я хьилэшыгъэр щӀэуфащ, цӀыхум и акъылрэ и гупсысэрэ куущ, къэщӀэгъуейщ.

⁸ Ауэ абыхэм Тхьэм ятригъэхуэнщ шабзэшэр; уащӀэдэмыщӀэу иуӀэнщ ахэр.

⁹ Езыр-езыру, я бзэкӀэ, загъэкӀуэдыжынщ абыхэм, я щхьэр ягъэсысынщ ахэр зылъагъу псоми.

¹⁰ Щышынэнщ цӀыху псори Тхьэм, Абы и Ӏуэхухэр яӀуэтэнщ, абыхэм егупсысэнщ.

¹¹ Зиусхьэным хуэщыпкъэхэр щыгуфӀыкӀыу, щхьэегъэзыпӀэ ирещӀ щыпкъагъэ зигу илъ псоми, Абы щӀыхь хурырещӀ.