Уэрэд 61 - ХъыбарыфӀыр. ЩӀэдзапӀэр. Уэрэд ЛъапӀэхэр

61-нэ Уэрэд Тхьэм укъихъумэным ущыгугъыныр

¹ Пшынауэ Ӏэтащхьэ Едутун папщӀэ. Даут и уэрэд

² Тхьэ закъуэращ си псэм гупсэхугъуэ зригъуэтылӀэр; Аращ сымыкӀуэду сыкъезыгъэлынур.

³ А зыращ сыкъэзыхъумэ абрэмывэр, быдапӀэу сиӀэр – сыгулэзыжынкъым.

⁴ ЦӀыхуу блын ебам хуэдэм, набжэ цӀырхъ ещӀам ещхьым, дапщэрэ фытебэна, ивудын щхьэкӀэ?

⁵ Ар лъэгапӀэм кърадзыхыну абыхэм я мурадщ, пцӀыр я щӀасэщ абыхэм; фӀы жаӀэ я жьэкӀэ, ягукӀэ гыбзэм ирагъэхь.

⁶ Тхьэ закъуэращ си псэм гупсэхугъуэ зригъуэтылӀэр, сыту жыпӀэмэ Аращ сызыщыгугъыр.

⁷ А зыращ сыкъэзыхъумэ абрэмывэр, быдапӀэу сиӀэр, сыгулэзыжынкъым игъащӀэкӀэ.

⁸ Гугъуехьым сыхэзышыжыр, щӀыхь къызэзытри Тхьэращ; лъэкӀыныгъэ зиӀэ абрэмывэу си щхьэегъэзыпӀэр Тхьэращ.

⁹ ЦӀыху лъэпкъыр! Сыт хуэдэ зэмани Абы фыщыгугъ; фи гурылъыр къыщыфӀуатэ Абы и пащхьэ. Тхьэр дэркӀэ щхьэегъэзыпӀэщ.

¹⁰ ЦӀыхум и къуэхэр – бэуэгъуэ къудейщ, лӀым и къуэхэр нэпцӀ зэфэзэщщ; тэрэзэм теплъхьэрэ пшэчмэ, зы мэскъали къашэчынукъым.

¹¹ Къуентхъым фыщымыгугъ, хъунщӀэным фримыкъей, мылъкур багъуэмэ, абы фыхуэмынэхъуей.

¹² Тхьэм зэ жиӀэри, сэ тӀэу зэхэсхащ – гуащӀэр Тхьэм дежщ здэщыӀэр.

¹³ Лъагъуныгъэ мыкӀуэдыжыр Уэращ зиӀэр, ди Тхьэ, сыту жыпӀэмэ Уэ дэтхэнэми дыболъагъу илэжьам хуэфащэр.