Уэрэд 60 - ХъыбарыфӀыр. ЩӀэдзапӀэр. Уэрэд ЛъапӀэхэр

60-нэ Уэрэд Тхьэр си щхьэегъэзыпӀэщ

¹ УэрэдыӀуэхэмрэ пшынауэхэмрэ я пашэм папщӀэ. Бзэпс зэрылъ пшынэкӀэ дожьу. Даут и уэрэд

² Къызэхэх, Зиусхьэн, си гукъеуэ макъ, къедэӀу си тхьэлъэӀум!

³ ЩӀыгум и гъунэ сыщыӀэу, нэщхъеягъуэм сыхэту, сыноджэ: сыдэш абрэмывэу сэ сыздынэсын слъэмыкӀынум;

⁴ сыту жыпӀэмэ Уэращ си щхьэегъэзыпӀэр, Уэращ си бийхэмкӀэ быдапӀэ лъэщу сэ сиӀэр.

⁵ ИгъащӀэкӀэ сыщрепсэу уи унэшхуэм, Уи дамэ щӀагъым щхьэегъэзыпӀэ сыщреӀэ.

⁶ Сыту жыпӀэмэ Уэ, ди Тхьэ, псалъэу уэстар зэхэпхащ, уи цӀэм фӀэлӀыкӀ хузиӀэхэм ягъуэт ӀыхьэфӀыр сэри къызэптащ.

⁷ Пащтыхьым и махуэм махуэхэр къыпыщэ; абы и илъэсхэр кӀыхь ящыщӀ щӀэблэ къэкӀуэнухэм.

⁸ Тхьэм къихъумэу ар и тахътэм трес игъащӀэкӀэ; лъагъунэгъэ мыкӀуэдыжымрэ щыпкъагъэмрэ кърехъумэ ар.

⁹ Псалъэу уэстахэр сыт махуи сэри согъэпэж, уи цӀэм уэрэдкӀэ щӀыхь хузощӀ.