Уэрэд 56 - ХъыбарыфӀыр. ЩӀэдзапӀэр. Уэрэд ЛъапӀэхэр

56-нэ Уэрэд ДэӀэпыкъуэгъум папщӀэ Уэрэд

¹ УэрэдыӀуэхэмрэ пшынауэхэмрэ я пашэм папщӀэ. «СумыгъэкӀуэд» макъамэр щӀэлъу ягъэӀу. Шаул зыфӀигъэпщкӀуэрэ, бгъуэнщӀагъым щӀыхьауэ, Даут иуса уэрэд

² ГущӀэгъу къысхуэщӀ, ди Тхьэ, гущӀэгъу къысхуэщӀ; си псэм щхьэегъэзыпӀэ зыщигъуэтыр уи дежщ, сызыхэт тхьэмыщкӀагъэр сщхьэщыкӀыху, сэ Уэ уи дамэм я щӀагъ сыщӀэтынщ.

³ Тхьэуэ Псом я Нэхъ Лъагэм солъэӀу, и гухэлъ къысхуэзыщӀ Тхьэр.

⁴ Къригъэхынщ уафэгум дэӀэпыкъуэгъу, сыхэзыутэхэр игъэукӀытэнщ Абы; и лъагъуныгъэ мыкӀуэдыжыр си гъусэнщ, щыпкъагъэкӀи къыздызекӀуэнщ.

⁵ Сэ сахэхуащ аслъэнхэм; сахэлъщ цӀыхур зэтезышхыхьхэм; абыхэм я дзэр бжым, шабзэшэм, я бзэгур джатэ жаным хуэдэщ.

⁶ Уафэгум нэхърэ нэхъ лъагэу уӀэтауэ ирехъу Уэ, ди Тхьэр, щӀыгум дэнэкӀи уи щӀыхьыр щрыреӀэ.

⁷ Си лъакъуэм лъахъэ къыхуагъэхьэзыращ; си гур кӀуэдыпащ; си пащхьэм щатӀащ мащэ, арщхьэкӀэ абы ихуахэр езырхэщ.

⁸ СигукӀэ сыбыдэщ, ди Тхьэ; уэрэд жысӀэнущ, щӀыхьу сиӀэр уэрэдкӀэ сӀуэтэнущ.

⁹ Къэуш, си псэ. Къэуш пшынэдыкъуакъуэр, шыкӀэпшынэр! Сэ нэхущыр къэзгъэушынщ.

¹⁰ ЦӀыху лъэпкъым сахэту, уи щӀыхьыр, Зиусхьэн, сэ сӀуэтэнщ; лъэпкъ мащӀэм сахэту, уи щӀыхьыр уэрэдкӀэ сӀуэтэнщ.

¹¹ Сыту жыпӀэмэ мыкӀуэдыжын уи лъагъуныгъэр уафэгум нэхърэ нэхъ лъагэщ, уи щыпкъагъэр уафапшэхэм нос.

¹² Уафэгум нэхърэ нэхъ лъагэу уӀэтауэ ирехъу Уэ, ди Тхьэр; щӀыгум дэнэкӀи уи щӀыхьыр щреӀуатэ!