Уэрэд 55 - ХъыбарыфӀыр. ЩӀэдзапӀэр. Уэрэд ЛъапӀэхэр

55-нэ Уэрэд Тхьэм ущыгугъыныр

¹ УэрэдыӀуэхэмрэ пшынауэхэмрэ я пашэм папщӀэ. Мэкъамэр: «Жыгей мэзым хэс тхьэрыкъуэ анэр». Филиштхэм Гат къалэм щыщаубыдым, Даут иуса уэрэд

² Ди Тхьэ, гущӀэгъу къысхуэщӀ! Сыту жыпӀэмэ цӀыхухэм сыхаутэ; махуэ енкӀэ кэытебанэхэурэ, къыспэувхэм гузэвэгъуэм сыхадзэ.

³ Махуэ енкӀэ сыхаутэ си бийхэм; загъэпагэурэ, бэ зэрогъэхъу къыстебанэхэр!

⁴ Шынагъуэм сыщиубыдкӀэ, ди Тхьэ, сэ Уэращ сызыщыгугъыр.

⁵ Тхьэуэ зи псалъэм щӀыхь хуэсщӀым сыщогугъ, сыщышынэркъым; сыт къызищӀэфын лӀэжыну цӀыхум?

⁶ ЖызмыӀахэр къыстралъхьэ махуэ енкӀэ; ягу къысхуэкӀ псори бзаджагъэщ.

⁷ Зэругъуеяхэщ, заущэху, си лъэбакъуэр ябж, къызощэ си псэр ягъэныну.

⁸ Я бзаджагъэр егъэпшыныж, ди Тхьэ, уи губжьыгъуэм цӀыху лъэпкъхэр гъэлъахъшэ.

⁹ Си гукъеуэ псори плъытащ, си нэпсхэр зыхуэдизыр зэгъащӀэ – уи тхылъым итхакъэ ахэр?

¹⁰ Сэ Уэ сыныщолъэӀу махуэм зэщӀэкӀуэжащ си бийхэр; мыр сощӀэ сэ: Тхьэр къыскъуэтщ.

¹¹ Тхьэуэ зи псалъэм щӀыхь хуэсщӀым, Зиусхьэну зи псалъэм щӀыхь хуэсщӀым, сыщогугъ.

¹² Тхьэм сыщогугъри, сышынэркъым; цӀыхум сыт къызищӀэфын сэ?

¹³ Ди Тхьэ, псалъэ быдэу уэстар згъэпэжын хуейуэ си хьэкъщ сэ, щӀыхь къурмэнхэр пхуэсщӀынщ.

¹⁴ Сыту жыпӀэмэ Уэ си псэр ажалым щыпхъумащ, сымылъэпэрэпэни сыпщӀащ – гъащӀэ къыдэзыт Тхьэм и пащхьэ нэхум сыщызекӀуэну.