Уэрэд 54 - ХъыбарыфӀыр. ЩӀэдзапӀэр. Уэрэд ЛъапӀэхэр

54-нэ Уэрэд КърахуэкӀ лӀым и тхьэлъэӀу

¹ УэрэдыӀуэхэм я пашэм папщӀэ. Бзэпс зэрылъ ӀэмэпсымэхэмкӀэ ягъэӀу. Даут и акъылыфӀагъэ уэрэд

² Къызэхэх, ди Тхьэ, си тхьэлъэӀур, зыщумыгъэпщкӀу си лъэӀум

³ КъызэдэӀуи, жэуап къызэт; срагъэшащ къину сызыхэтым; сагъэгупсэхуркъым

⁴ бий макъыу зэхэсхым, цӀыху бзаджэм егъэзыгъэ сызэращӀым; сыту жыпӀэмэ абыхэм къиным сыхадзэ, губжьым хэту сэ сагъэбий.

⁵ Си гур къокӀэзызыкӀ, сыӀэщӀэхуащ ажал шынагъуэшхуэм.

⁶ Сошынэ сэ, сокӀэзыз, шынагъуэшхуэм сызыӀэщӀиубыдащ.

⁷ Абдежым сэ жысӀащ: «Тхьэрыкъуэм и дамэм хуэдэ сиӀатэмэ, жыжьэу сыӀулъэтыкӀыжынти, гупсэхугъуэ згъуэтыжынт;

⁸ жыжьэу сыхыхьэжынти, губгъуэ нэщӀым ситынт;

⁹ жьапщэмрэ уаемрэ защысхъумэным сыхуэпӀэщӀэнт».

¹⁰ ЗэӀыгъэхьэ я гухэлъхэр, Зиусхьэн, я бзэхэр зэхэгъэзэрыхь; сыту жыпӀэмэ залымыгъэрэ зэныкъуэкъурэ щыслъэгъуащ къалэм.

¹¹ Жэщми махуэми абыхэм къалэм и блынхэр хъурейуэ къакӀухь; бзаджагъэрэ тхьэмыщкӀагъэрэ къыщохъу.

¹² УзэкӀуэдылӀэнщ абы къыщыхъур: егъэзыныгъэмрэ хьилагъэмрэ абы и уэрамхэм дэкӀыркъым.

¹³ Сыту жыпӀэмэ сэ сызыубыр бийракъым – ар сшэчын слъэкӀынт; си жагъуэгъуркъым сызыгъэпудыр – абы зыщызгъэпщкӀун слъэкӀынт;

¹⁴ уэращ сэ къыспэщӀэувэр – си ныбжьэгъурщ, си благъэрщ, си нэӀуасэ дыдэрщ;

¹⁵ Щхьэихауэ дызэдэуэршэру, дызэщӀыгъуу къыщыткӀухьырт Тхьэм и унэшхуэм.

¹⁶ КъахурекӀуэ ажалыр абыхэм, ямыщӀэххэу псэу щӀыкӀэ ирекӀуэ хьэдрыхэ; сыту жыпӀэмэ я унэхэм изщ бзаджагъэр, ягухэми илъщ.

¹⁷ Ауэ сэ Тхьэм зыхуэзгъэзэнщи, Зиусхьэным сыкъригъэлэнщ.

¹⁸ Пщыхьэщхьэми, пщэджыжьми, шэджагъуэми сытхьэусыхэнщ сэ, сыгъынщ, Абы си макъыр зэхихынщ.

¹⁹ МамыркӀэ си псэр ящихъумэнщ къыспэувхэм – ахэр бэ мэхъу.

²⁰ Тхьэм зэхихынщи, иж-ижьыж лъандэрэ и тахътэм тесым ахэр игъэӀэсэнщ; сыту жыпӀэмэ абыхэм захъуэжыркъым; Тхьэм ахэр щышынэркъым.

²¹ Дэ, мамыру псэухэм, дигъэбийурэ и Ӏэ къыттришэщӀащ си гъусам ди зэгурыӀуэныгъэм епцӀыжащ ар;

²² и Ӏупэр тхъум нэхърэ нэхъ щабэщ, ауэ игу жагъуэгъуныгъэр илъщ; и псалъэхэр дагъэм нэхърэ нэхъ щабэщ ауэ ахэр джатэ пцӀанэщ.

²³ Уи гукъеуэр Зиусхьэным ехьэлӀи, Ар щӀэгъэкъуэну пхуэхъунщ. Тхьэм хуэщыпкъэр Абы игъащэкӀэ игъэплъэрэпэнкъым.

²⁴ Уэ, ди Тхьэ, ажалым и мащэм ипшэнущ ахэр; лъым щӀэнэцӀхэм, хьилэшыхэм я гъащӀэм и ныкъуи къапсэункъым. Сэ Уэращ сызыщыгугъынур, Зиусхьэн.