Уэрэд 52 - ХъыбарыфӀыр. ЩӀэдзапӀэр. Уэрэд ЛъапӀэхэр

52-нэ Уэрэд ЦӀыхухэм я бзаджагъэр

¹ УэрэдыӀуэхэмрэ пшынауэхэмрэ я пашэм папщӀэ. Даут и акъылыфӀагъэ уэрэд

² Акъылыншэм игукӀэ жеӀэ: «ЩыӀэкъым Тхьэ». Абыхэм я акъылыр зэкӀуэкӀащ, Бзаджагъэ Ӏейхэр ялэжьащ; фӀы зыщӀэ яхэткъым абыхэм

³ Тхьэр уафэгум къоплъыхри, цӀыхум и къуэхэм къахоплъэ акъылыфӀэу, Езым лъыхъуэ яхэтмэ, ищӀэн папщӀэ.

⁴ Тхьэм и гъуэгум дэхащ псори, зэщыркъабзэу зэкӀуэкӀащ; фӀы зыщӀэ яхэткъым зы нэрыбгэ закъуи.

⁵ Бзаджагъэ зезыхьэхэм зэхэщӀыкӀ ямыӀэу ара, щӀакхъуэ зэрашхым хуэдэу, си цӀыху лъэпкъыр зышхэу Тхьэм емылъэӀухэм?

⁶ Шынагъуэшхуэм зэлъиубыдынщ – зи хуэдэ къэмыхъуа шынагъуэм; уэ къыппэщӀэувэхэм я къупщхьэхэр Тхьэм ирикъухьынщ. ЕмыкӀу къебгъэхьынщ абыхэм, сыту жыпӀэмэ Тхьэм ӀэщӀыб ищӀащи.

⁷ Цион ӀуащхьэкӀэ къикӀыу Израил лъэпкъым къыхуэкӀуэнур хэт, бийхэм къаӀэщӀихыжыну? Зиусхьэным и лъэпкъыр гъэрыпӀэм къыщришыжкӀэ, Екъуб къытепщӀыкӀахэр гуфӀэгъуэшхуэм зэщӀищтэнщ Израилым и цӀыхухэм ягъуэтынщ дэрэжэгъуэшхуэ.