Уэрэд 51 - ХъыбарыфӀыр. ЩӀэдзапӀэр. Уэрэд ЛъапӀэхэр

51-нэ Уэрэд Тхьэм и хьэкумымрэ и лъагъуныгъэ мыкӀуэдыжымрэ

¹ УэрэдыӀуэхэмрэ пшынауэхэмрэ я пашэм папщӀэ. Даут и усыгъэ

² Эдом щыщ Доиг къакӀуэу, Ахимэлэх и унэм Даут къызэрихьэгъам и хъыбар Шаул къыщыхуихьым, Даут иусащ.

³ Сыт уэ, цӀыху лъэщыр, бзаджагъэу пщӀамкӀэ ущӀызыщытхъужыр? Тхьэм и лъагъуныгъэ мыкӀуэдыжыр дапщэщи щыӀэнущ.

⁴ ЦӀыхур зэрыбгъэунэхъуным уогупсыс, уи бзэгур сэ жан зэщӀэлъыкӀам хуэдэщ уэ, хьилагъэ зезыхьэм!

⁵ ФӀым нэхъ бзаджагъэр уигу нэхъ ирохь, пэж пӀуэтэным нэхърэ пцӀыр уэ нэхъ къыбощтэ.

⁶ УзэкӀуэдылӀэн псалъэу щыӀэхэр уэ уи щӀасэщ, уэ бзэгу хьилэщ.

⁷ Абы папщӀэ узэхикъутэнщ уэ Тхьэм, уричынщ, уи унэ урихунщ, псэ зиӀэу цӀыгум тетхэм яхигъэкӀуэдыкӀыжынщ уи лъапсэр.

⁸ Тхьэм хуэщыпкъэхэм ар ялъагъунщ, Зиусхьаным щышынэнущ, А цӀыхум щыдыхьэшхыурэ, жаӀэнщ:

⁹ «Мыращ Тхьэр щхьэегъэзыпӀэ зымыщӀу, и мылъкум щыгугъыу, и бзаджагъэр щхьэегъэзыпӀэ зыхуэзыщӀыжа цӀыхур».

¹⁰ Сэ Тхьэм и унэшхуэм къыщытӀэпӀ зейтун жыгым сыхуэдэщ. Тхьэм и лъагъуныгъэ мыкӀуэдыжыр игъащӀэкӀэ си гугъапӀэщ сэ,

¹¹ Уэ блэжьам папщӀэ щӀыхь пхуэсщӀынщ игъащӀэкӀэ; уи хъыбар уи цӀыху лъапӀэхэм зэлъезгъэщӀэнщ узэрэфӀым папщӀэ.