Уэрэд 49 - ХъыбарыфӀыр. ЩӀэдзапӀэр. Уэрэд ЛъапӀэхэр

49-нэ Уэрэд Тхьэр гукӀи псэкӀи гъэлъэпӀэныр

Асаф и уэрэд

¹ Къопсалъэ ЛъэкӀыныгъэ псори зиӀэу Тхьэуэ Зиусхьэныр щӀыгум и цӀыхухэм къоджэ дыгъэ къуэкӀыпӀэм щегъэжьауэ къухьапӀэм нэсу.

² Цион Ӏуащхьэу дахагъэм и щапхъэм Тхьэр нэхунэу, дыгъэм хуэдэу къыщопс.

³ Къос ди Тхьэр, Абы зиущэхуркъым: Абы и пэ итщ мафӀэлыгъейр, жьыбгъэшхуэр къещӀэкӀащ Абы.

⁴ Ар уэгуми щӀыгуми щыхьэту къоджэ и цӀыху лъэпкъым хьэкум тригъэщӀыхьыну.

⁵ Къысхуэщыпкъэхэр къысхуэвугъуей къурмэн щӀыгъуэм сызыгурыӀуахэр.

⁶ Абы и щыпкъагъэ уэгум къыщоӀу. Езы Тхьэращ хеящӀэр.

⁷ «КъэдаӀуэ, сыкъэпсэлъэнущ, си цӀыху лъэпкъ; Израил, уэ узгъэкъуаншэу щыхьэт сыхъунущ; Сэ сы-Тхьэщ, сэращ уэ уи Тхьэр!

⁸ Къурмэну пщӀыхэракъым зэрызгъэкъуаншэр, къурмэну пщӀыхэр Сэ куэду солъагъу.

⁹ Уи унэ къикӀа тани уи пщӀантӀэ къыдэкӀа ажи Сэ сыхуэныкъуэкъым.

¹⁰ Сэ сысейщ хьэкӀэкхъуэкӀэ псори, бгы минхэм ит былымхэри.

¹¹ Сэ сощӀэ: бгым щызелъатэ бзу псори, губгъуэм ис псэущхьэ псори сысейщ.

¹² МэжэщӀалӀагъэм сригъэзкӀи, уэ бжесӀэнукъым; сыту жыпӀэмэ Сэращ дунеишхуэри абы тет псори зейри.

¹³ Былымыл зэгуэрым сшха, ажэм и лъым сефа?

¹⁴ Тхьэм хуэпщӀ щӀыхьыр уи къурмэныпхъэ ирехъу, Псом я нэхъ Лъагэм псалъэу ептар гъэзащӀэ.

¹⁵ Къин щыплъагъу махуэм къызэджэ, укъыхэсшынщ, уэри щӀыхь къысхуэпщӀынщ».

¹⁶ Ауэ Тхьэм цӀыху бзаджэм къыжреӀэ: «Си унафэхэр сыт щӀэпӀуатэр, унафэу фхуэсщӀам и гугъу щӀэпщӀыр?

¹⁷ Си ущиехэм нэмыплъ епту, си псалъэхэм зыщыбодзей.

¹⁸ ДыгъуакӀуэр щыплъагъукӀэ, угуохьэ, куэпэчхэми уащӀыгъущ.

¹⁹ Бзаджагъэ жыпӀэну, уи жьэ зэтыбох, уи бзэгум хьилагъэхэр къепсэлъ.

²⁰ УтӀысауэ, уи къуэш уоуб, уи анэ и дэлъху и мыхьэкъ, хуэмыфащэ йопэс.

²¹ Ар щыблэжьым, Сэ зыри жысӀакъым, уэ сыпхуэдэу плъытащ абы щхьэкӀэ. УкъыщӀызогъэщ иджы, уи пащхьэ къызолъхьэ гуэныхьу блэжьар.

²² ЗэхэфщӀыкӀ ар фэ, Тхьэр зыщыгъупщэхэм, армырмэ фызэхэстхъуэнщ, фыхэзышыжын фымыгъуэту.

²³ Къурмэн хуэдэу, щӀыхь къысхуэзыщӀым сегъэлъапӀэ, зи гъуэгу ириплъэжыр къригъэлын Тхьэм зэрылъэкӀыр езгъэлъагъунщ».