Уэрэд 47 - ХъыбарыфӀыр. ЩӀэдзапӀэр. Уэрэд ЛъапӀэхэр

47-нэ Уэрэд Цион Тхьэм и къалэщ

¹ Уэрэд. Корах и къуэхэм я уэрэд

² Ин дыдэщ Зиусхьэныр, ди Тхьэм и къалэм Абы щӀыхьышхуэ щыхуащӀ.

³ Абы и Ӏуащхьэ лъапӀэр лъагэщ икӀи дахэ дыдэщ, щӀыгу псори щогуфӀыкӀ Цион Ӏуащхьэм, Тхьэм и Ӏуащхьэ щыпкъэщ ар, Пащтыхьышхуэм и къалэщ.

⁴ Абы быдапӀэу дэтхэм Тхьэр зэрахъумакӀуэр ящӀэ.

⁵ Сыту жыпӀэмэ пащтыхьхэр зэӀущӀэри, псори абы ебгъэрыкӀуащ яубыну;

⁶ ялъэгъуащ Цион Ӏуащхьэр, гъэщӀэгъуэн дыди къащыхъуащ, къэшынэри щӀатхъужащ.

⁷ Ахэр хэхуащ шынагъуэм, лъхугъэм хэт бзылъхугъэр зыхэхуэ гузэвэгъуэм хуэдэм.

⁸ Жьыбгъэшхуэм Таршиш кӀуэ кхъухьхэр зэрихуэм хуэдэу, зэхэптхъуащ Уэ псори.

⁹ Зэрызэхэтхам хуэдэу, ЛъэкӀыныгъэ псори зиӀэ Зиусхьэным и къалэу ди Тхьэм и къалэ. Тхьэм абы щилэжьа Ӏуэхухэр тлъэгъуащ дэ, Тхьэм игъащӀэкӀэ игъэуващ ар, щынагъуэ къылъэмыӀэсыну.

¹⁰ Уи унэшхуэм дыщӀэту, ди Тхьэ, Уи лъагъуныгъэ мыкӀуэдыжыным догупсыс дэ.

¹¹ Уи цӀэм хуэдэу, уи щӀыхьышхуэри, Тхьэ, щӀым и гъунэм нэсащ. Уи Ӏэ ижьым текӀуэныгъэри хахуагъэри къехь.

¹² ИрегуфӀэ Цион Ӏуащхьэр, уи хьэкум захуэщ, иудэпхъухэр, Зиусхьэн, къыпхуогуфӀэ.

¹³ Цион Ӏуащхьэ фыкъыдекӀуэкӀыурэ, ихъуреягъкӀэ къэфкӀухь; Абы и чэщанэ лъагэхэр къэфлъытэ;

¹⁴ абы и дэпкъхэм фигу яхуэвгъазэ; и быдапӀэхэр къэфплъыхь, ди ужь къихъуэну щӀэблэхэм яхуэфӀуэтэжыну,

¹⁵ лӀэщӀыгъуэм лӀэщӀыгъуэр кӀэлъыкӀуэу мы Тхьэр ди Тхьэщ. Ар гъуазэ къытхуэхъунщ игъащӀэкӀэ.