Уэрэд 45 - ХъыбарыфӀыр. ЩӀэдзапӀэр. Уэрэд ЛъапӀэхэр

45-нэ Уэрэд Тхьэр ди гъусэщ

¹ УэрэдыӀуэхэмрэ пшынауэхэмрэ я пашэм папщӀэ. Корах и къуэхэм папщӀэ. «Аламот» и макъамэм тегъэпсыхьащ

² ДэркӀэ щхьэегъэзыпӀэщ, гуащӀэ къыдэзытыр Тхьэращ, гугъуехьхэр къытщӀэзэрыхьмэ, Ар гъэунэхуауэ ди дэӀэпыкъуэгъущ.

³ Абы къыхэкӀкӀэ дышынэнкъым, щӀыгур зджызджами, бгыхэр къызэтелъалъэурэ хым хэджэразэми,

⁴ хыр къэукъубейрэ псыдзэр къытщӀэуэми, хы уалъэм бгыр зэрадзэми.

⁵ Тхьэм и къалэм щоушэ псы уэрхэр – Псом я Нэхъ Лъагэм и псэупӀэм.

⁶ Тхьэр абы и гупсэщ; щэнэуэнкъым а къалэр Нэхущыгъуэм Тхьэр абы дэӀэпыкъуэгъу хуэхъунущ.

⁷ ЦӀыху лъэпкъхэр зэрызехьэ хъуащ; пащтыхьыгъуэхэр зэщӀохъае. Псом я Нэхъ Лъагэм и макъ къэӀуащ, щӀыгур мэткӀу.

⁸ ЛъэкӀыныгъэ псори зиӀэ Зиусхьэныр ди гъусэщ, ди адэжьу Екъуб и Тхьэрщ щхьэегъэзыпӀэу диӀэр.

⁹ ФыкъакӀуи, зэвгъэлъагъу Зиусхьэным и Ӏуэхухэр – Ӏуэху щӀагъуэу щӀыгум щилэжьахэр.

¹⁰ ЩӀыгу гъунэм нэсу зауэхэр щегъэувыӀэ, зэпеч шабзэпсыр, зэпеуд бжыр, мафӀэм пэредзэри, мэӀухэр егъэс.

¹¹ «Фыкъэувурэ, Сэ сызэры – Тхьэр зэвгъащӀэ: цӀыху лъэпкъхэми сагъэлъапӀэ, сыщагъэлъапӀэ щӀыгуми».

¹² ЛъэкӀыныгъэ псори зиӀэ Тхьэр ди гъусэщ, ди адэжьу Екъуб и Тхьэрщ щхьэегъэзыпӀэу диӀэр.