Уэрэд 44 - ХъыбарыфӀыр. ЩӀэдзапӀэр. Уэрэд ЛъапӀэхэр

44-нэ Уэрэд Пащтыхьым и нысашэ уэрэд

¹ УэрэдыӀуэхэмрэ пшынауэхэмрэ я пашэм папщӀэ. «Шуманым» уэрэдым и макъамэр щӀэлъу жаӀэ. Корах и къуэхэм я уэрэд. Лъагъуныгъэ уэрэд

² Си гущӀэм къыщызэпощэ псалъэ дахэхэр; сэ жызоӀэ: Пащтыхьым папщӀэщ си уэрэдыр; си бзэгур – тхакӀуэ Ӏэзэм и къабзийщ.

³ ЦӀыхум и къуэхэм уэ уранэхъ дахэщ; уи жьэм фӀыгъуэр къыжьэдокӀ; абы папщӀэ Тхьэм и нэфӀ къыпщыхуащ игъащӀэкӀэ.

⁴ Уи джатэр зыгуэпхэ, лӀы бланэ, уи дахагъэрэ уи щӀыхьрэ уаӀэту.

⁵ ТекӀуэныгъэр къыдэх, гужэрым итӀысхьи, щыпкъагъэм, захуагъэм папщӀэ; Уи Ӏэ ижьым и Ӏуэху гъэщӀэгъуэн дыдэхэр уэ уигъэлъагъунщ.

⁶ Жаныбзэщ уэ уи шабзэшэхэр; Пащтыхьым и бийхэм ягу ирахащ абыхэм, щехуэхынщ цӀыху лъэпкъхэр уи пащхьэ.

⁷ Тетыгъуэу Тхьэм къыуитар мыкӀуэдыжынщ. Уи тетыгъуэм и дамыгъэ къащӀэр – щыпкъагъэм и къащӀэ захуэщ.

⁸ Щыпкъагъэр фӀыуэ уолъагъу, бзаджагъэр уи жагъуэщ уэ; абы папщӀэ Тхьэуэ уи Тхьэм гуфӀэгъуэр уигъэгъуэтащ, уи гъусэхэм ебэкӀыу.

⁹ Уи щыгъыну хъуам – смирнэ, алое, касие дагъэм я мэ ӀэфӀ къапех. Пыл къупщхьэкӀэ ягъэдэха унэ дэгъуэхэм шыкӀэ пшынэм ущагъэгуфӀэ.

¹⁰ Уэ къыпхуэлэжьэну зыхуэбгъэфэща бзылъхугъэхэм пащтыхьхэм япхъухэр яхэтщ. Я нэхъ дыщэ къабзэр зи фащэу, щхьэгъусэ пхуэхъуну пщащэр уи ижьырабгъу лъэныкъуэмкӀэ щытщ.

¹¹ ДаӀуэ, пщащэ, плъэ, уи тхьэкӀумэ теубыди, зыщыгъэгъупщэ уи лъэпкъи уи адэ и уни.

¹² Уи дахагъэм къыхуеинущ пащтыхьыр; сыту жыпӀэмэ Ар уи Зиусхьэнщ, аращи, Абы щхьэщэ уэ хуэщӀ.

¹³ Тирэ къалэм и цӀыхухэр, тыгъэхэр яӀыгъыу, лъэпкъым щыщу я нэхъ бей дыдэхэри, уигу ягъэзэгъэн папщӀэ, уэ къолъэӀунущ.

¹⁴ Щхьэгъусэ хуэхъуну пщащэр сэрейм щӀохьэ, абы и щыгъыныр дыщэ ӀуданэкӀэ дащ,

¹⁵ фащэ зэщӀэпщӀыпщӀэр щыгъыу пащтыхьым хуашэ абы и ужь итхэу пщащэхэр, абы и пщащэ ныбджэгъухэр уэ къыпхуашэ.

¹⁶ Къашэ нэжэгужэу, я гуфӀэгъуэшхуэу. КъыщӀохьэ сэрейм.

¹⁷ Уи адэжьхэм я пӀэкӀэ уи къуэхэр къэхъунщ, щӀыгум дэнэкӀи ахэр уэ пщыуэ щыбгъэувынщ.

¹⁸ ЩӀэблэ псоми уи цӀэр ящымыгъупщэжыну сэ сщӀынщ; абы папщӀэ цӀыху лъэпкъхэм игъащӀэкӀэ уи цӀэм щӀыхь хуащӀынщ.