Уэрэд 43 - ХъыбарыфӀыр. ЩӀэдзапӀэр. Уэрэд ЛъапӀэхэр

43-нэ Уэрэд ЦӀыху лъэпкъым и тхьэусыхэ

¹ УэрэдыӀуэхэмрэ пшынауэхэмрэ я пашэм папщӀэ. Корах и къуэхэм я уэрэд

² Уэ Тхьэ, дэ зэхэтхащ ди тхьэкӀумэкӀэ, ди адэхэм пасэ зэманым Уэ бгъэхъахэр къытхуаӀуэтэжащ дэ.

³ Хамэ лъэпкъхэр ипхуащ уи ӀэкӀэ, абыхэм я хэкум ди адэжьхэр ибгъэтӀысхьащ; хамэ лъэпкъхэр бгъэунэхъуащ, ауэ ди адэжьхэр бгъэунащ.

⁴ Сыту жыпӀэмэ абыхэм я джатэкӀэкъым щӀыгур зэраубыдар, я гуащӀэркъым текӀуэныгъэр къахуэзыхьар – Уи Ӏэ ижьымкӀэщ, уи гуащӀэкӀэщ, уи нэгу и нэхугъэкӀэщ; сыту жыпӀэмэ Уэ абыхэм нэфӀкӀэ уеплъащ.

⁵ Уэращ си пащтыхьыр, си Тхьэр! Израил лъэпкъым текӀуэныгъэр къихьыну унафэ щӀы.

⁶ Узигъусэмэ, ди бийхэм вым хуэдэу дэ дебжьэкъуэуэнщ; Къытпэувхэр лъакъуэкӀэ хэдгуэнщ дэ – Уи цӀэм и хьэтыркӀэ.

⁷ Сыту жыпӀэмэ сызыщыгугъыр си шабзэркъым, сыкъезыгъэлыр си джатэркъым.

⁸ Уэ ди бийхэм даӀэщӀэпхыжащ, дыкъэзылъэгъу мыхъухэр бгъэулъиящ.

⁹ Тхьэм щӀыхь хуэтщӀащ сыт щыгъуи, Уи цӀэм щӀыхь хуэтщӀынщ игъащӀэкӀэ.

¹⁰ Ауэ иджыкӀэ Уигу дихуащ дэ, емыкӀу къэдбгъэхьащ, ди дзэми уаныдежьэркъым,

¹¹ бийм дребгъэхужьащ Уэ, ди жагъуэгъухэм дэ дахъунщӀащ.

¹² Мэл хуэдэ дыфӀебгъэбзащ, хамэ лъэпкъхэм икъухьауэ дахуэбгуэшащ.

¹³ Уи цӀыху лъэпкъыр пщащ и мыуасэкӀэ, и пщӀэкӀи бгъэпудащ.

¹⁴ ИкӀагъэ къыдапэсыну дызыдэпсэу хамэхэм дептащ, дызыхэсхэр къытщыдыхьэшхыу, дызэрамыпэсын пщӀащ.

¹⁵ Хамэ лъэпкъхэр къытщӀэнакӀэу, хамэ лъэпкъхэм я щхьэ тхуагъэсысыжу Уэ пщӀащ.

¹⁶ Махуэ псом сызыщоукӀытэж, си напэр укӀытэм ес,

¹⁷ мыхъун къызжезыӀэу сызыубым я макъ зэхэсхмэ, си бийрэ къызэгуэуэнумрэ сыщыӀуплъэкӀэ.

¹⁸ Дэ утщымыгъупщагъэми, Уи зэгурыӀуэныгъэ дымыкъутами, а псори къыдэуэлӀащ.

¹⁹ Дэ дигу икӀуэтакъым, Уи гъуэгум дыдэхакъым,

²⁰ итӀани хьэӀуцыдзхэм я щӀыгум дибгуашэри, хьэдэ джэбыныр къыттепхъуащ.

²¹ Ди Тхьэм и цӀэр тщыгъупщэу, хамэм и тхьэм делъэӀуну ди Ӏэр хуэтшиятэмэ,

²² Тхьэм ар ищӀэнтэкъэ? Сыту жыпӀэмэ гум и щэхухэр ещӀэ Абы.

²³ Уэращ дызейр, ди псэр хахыну шынагъуэм дыхэтщ махуэ къэси, фӀабзыну мэлым хуэдэущ дызэралъытэр.

²⁴ Дыкъэлъагъу, сыт узыхуэжейр, Зиусхьэн? Къэуш, думыщӀ ӀэщӀыб игъащӀэкӀэ.

²⁵ Сыт щӀыщӀэбуфэр уи нэгу? Къиным дызэрыхэтыр, егъэзыгъэу дызэрыпсэур сыт щхьэкӀэ зыщыбгъэгъупщэрэ?

²⁶ Ди Ӏур егъэзыхауэ дыщылъщ, щӀыгум дытраӀулӀауэ.

²⁷ Зыкъэший, дэӀэпыкъуэгъу къытхуэхъу, Уи лъагъуныгъэ мыкӀуэдыжыным и хьэтыркӀэ Уэ дыхэшыж.