Уэрэд 41 - ХъыбарыфӀыр. ЩӀэдзапӀэр. Уэрэд ЛъапӀэхэр

41-нэ Уэрэд Тхьэм ухуэзэшыныр

¹ УэрэдыӀуэхэмрэ пшынауэхэмрэ я пашэм папщӀэ. Корэх и къуэхэм я уэрэд

² Бланэр псым зэрыхуэпабгъэм хуэдэу, си псэр Уэ къыпхуэзэшащ, ди Тхьэ!

³ Тхьэм, Тхьэ псэум хуэзэшащ си псэр: СыкӀуэу, дапщэщ Тхьэм и нэгу сыщиплъэнур?

⁴ «Уи Тхьэр дэнэ щыӀэ?» жаӀэу щӀэмычэу къызэупщӀ щыхъукӀэ, си нэпсыр жэщи махуи къыщӀож.

⁵ Гукъеуэшхуэм сызэлъищтауэ, а Ӏуэхухэр сигу къызогъэкӀыж, сыту жыпӀэмэ цӀыху Ӏувым сащӀыгъуу, махуэшхуэ зиӀэ цӀыхум я гуфӀэгъуэрэ я щытхъу макъымрэ сыхэту сэ сихьащ Тхьэм и унэшхуэм.

⁶ Сыт узыгъэхыщӀэр, сигу, сыт узыгъэгумэщӀыр? Тхьэм щыгугъ, зышыӀэ, сыту жыпӀэмэ сэ Абы щӀыхь хуэсщӀынщ иджыри, – си КъегъэлакӀуэу си Тхьэм.

⁷ Си псэр гукъыдэжыншэу мэхыщӀэ; абы къыхэкӀкӀэ Иордан щӀыгум, си хэку сыпэжыжьэу, Хьэрмон, Мицар къущхьэхэм ситу, сигу укъэкӀыжащ.

⁸ Уи псы уэрхэм я макъкӀэ Къуэ щӀэншэхэр зэподжэж; Уи псы уэрхэри уи псы уалъэхэри сэ сщхьэдэхакӀэщ.

⁹ Зиусхьэным и лъагъуныгъэ мыкӀуэдыжыр махуэм къыслъоӀэс, жэщым Абы уэрэд хужызоӀэ, гъащӀэ къызэзыт Тхьэм си тхьэлъэӀур изохьэлӀэ.

¹⁰ ЖызоӀэ Тхьэм, сыкъэзыхъумэ абрэмывэм: «Сыт щхьэкӀэ сыпщыгъупща? Сэ бийм сригъэзурэ, сигъэнэщхъейуэ сыт щхьэкӀэ сыкъекӀуэкӀрэ?»

¹¹ Си къупщхьэхэр зэхагъэщащэ хуэдэ, мыхъунхэр къызжаӀэ си бийхэм, зэпымыууэ сэ къызаӀуэкӀ: «Дэнэ щыӀэ уи Тхьэр?»

¹² Сыт узыгъэхыщӀэр, сигу, сыт узыгъэгумэщӀыр? Тхьэм щыгугъ, зышыӀэ; сыту жыпӀэмэ сэ Абы щытхъу хуэсщӀынщ ыджыри, – си КъегъэлакӀуэу си Тхьэм.