Уэрэд 4 - ХъыбарыфӀыр. ЩӀэдзапӀэр. Уэрэд ЛъапӀэхэр

4-нэ Уэрэд Пщыхьэщхьэ тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. ШыкӀэ пшынэкӀэ дежьууэ. Даут и уэрэд

² СыныщоджэкӀэ сыкъызэхэх, Тхьэуэ си хьэкъыр сэ къызэзыт! ЩӀыпӀэ зэвым сыщихуам, ар Ӏэхуитлъэхуит схуэпщӀащ. ГущӀэгъу къысхуэщӀ, си тхьэлъэӀур къызэхэх.

³ Фэ, зыкъызыфӀэщӀыжхэм, си щӀыхьыр сыт хуэдизрэ вгъэпудыну? Ӏуэху пщӀэншэхэм зыдевгъэхьэхыу, пцӀым сыт хуэдизрэ фыхэтыну?

⁴ Зиусхьэным и фӀэлӀыкӀ зигу илъыр Езым папщӀэ къызэрыхихар зэвгъащӀэ: сэ сыщеджэкӀэ Зиусхьэным сызэхех.

⁵ Гузэвэгъуэм фыхэтми, гуэныхь фымыщӀэ; фи гъуэлъыпӀэ филъу фэр-фэрурэ фыгупсысэ, зывгъэӀэсэ.

⁶ Хабзэм тету къурмэн фщӀы, фыщыгугъ Зиусхьэным.

⁷ Куэдым жаӀэ: «ХуэщӀауэ дыпсэуатэмэ!» Уи нэгум и нэху къыттегъапсэ, Зиусхьэн!

⁸ ЦӀыхухэм гъавэмрэ санэмрэ щахуэбагъуэм си гуфӀэгъуэр Уэ нэхъыбэ пщӀащ.

⁹ Сигу псэхуауэ согъуэлъри сожей, сыту жыпӀэмэ Уэ Зырщ, Зиусхьэн, шынагъуэншэу сызыгъэпсэур.