Уэрэд 39 - ХъыбарыфӀыр. ЩӀэдзапӀэр. Уэрэд ЛъапӀэхэр

39-нэ Уэрэд Щытхъу Уэрэд. ДэӀэпыкъуэгъум хуагъэхьа тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² ЗысшыӀэурэ, Зиусхьэным сежьэрти, Абы зыкъысхуигъазэри, си джэ макъ къызэхихащ;

³ ЛӀэныгъэм и мащэм сэ Абы сыкърихыжащ, – сэрэш фӀейм сыкъыхишыжри, си лъэр мывэм тригъэуващ, сигъэбыдащ.

⁴ Си Ӏупэм къритащ уэрэдыщӀэ – ди Тхьэм хуэгъэза щытхъу уэрэд. Бэм къалъагъунщи, шынэнщ, ахэр щыгугъынщ Зиусхьэным.

⁵ Зиусхьэным щыгугъ цӀыхур насыпыфӀэщ – пагагъэм, нэпцӀым захуэзымыгъазэ цӀыхур.

⁶ Зиусхьэну си Тхьэ, уи Ӏуэху гъэщӀэгъуэнхэри, дэркӀэ уи гухэлъхэри бэщ; хэт хъун Уэр хуэдэ! Абыхэм я хъыбар цӀыхухэм яхуэсӀуэтэн сфӀэигъуэщ, ауэ гъунэншэщ я бжыгъэр.

⁷ Ухуеякъым къурмэн тыгъэ лъапӀи; си тхьэкӀумэхэм зэхахын ялъэкӀыну пщӀащ Уэ; гуэныхьхэм папщӀэ жьэрымэ згъэунуи къурмэн сщӀынуи Уэ укъыщӀэдэуакъым.

⁸ Абы щыгъуэм жысӀащ сэ: мыращ, сыкъэкӀуащ; Тэурэтыр зэрыт тхылъым сэ къызэхьэлӀауэ итщ:

⁹ Си Тхьэ, сыгуфӀэурэ согъэзащӀэ Уэ пфӀэигъуэр, Уи хабзэр сигу илъщ.

¹⁰ Уэ цӀыхухэр къиным зэрыхэпшыжым и хъыбар зэӀущӀэшхуэм щысӀуэтащ сэ; си бзэгум пэрыуэгъу сыхуэхъуакъым; Уэ, Зиусхьэн, ар уощӀэ.

¹¹ КӀуэдыпӀэм дыкъызэрипшыжар цӀыхухэм ящызбзыщӀакъым, щыпкъагъэ къызэрытхууиӀэмрэ дыкъызэребгъэламрэ яхуэсӀуэтащ, зэӀущӀэшхуэм сыщыхэтам, уи лъагъуныгъэ мыкӀуэдыжымрэ щыпкъагъэу зепхьэмрэ сущэхуакъым.

¹² Уи гущӀэгъум сыхыумын, Зиусхьэн; уи лъагъуныгъэ мыкӀуэдыжымрэ щыпкъагъэу къысхууиӀэмрэ сыт щыгъуи сакъегъэхъумэ.

¹³ Сыту жыпӀэмэ гъунэ зимыӀэ тхьэмыщкӀагъэм сыхэхуащ сэ; сяпэ ищащ бзаджагъэ къызэзыщӀэхэр, сыплъэн слъэмыкӀыу сащӀащ; щхьэц налъэу стетым нэхърэ нэхъыбэщ ахэр; сигуми сыкъибгынащ.

¹⁴ ФӀы къысхуэщӀи, сыхэшыж, Зиусхьэн; Уи дэӀэпыкъуныгъэм куэдрэ сыпумыгъаплъэ, Зиусхьэн.

¹⁵ ЕмыкӀу кърехь, нэпэншэ ирехъу си псэм къещэ псори! Ирырегъэзэж я деж, ауан ирырещӀ мыхъун къызэхъулӀэн зыфӀэигъуэхэр.

¹⁶ Ирегъэшынэж емыкӀуу къахьам мыр къызжезыӀэхэр: «Дэгъуэщ! Дэгъуэщ!»

¹⁷ ИрегуфӀэ, иренэжэгужэ Уэ къыплъыхъуэхэр, къызэребгъэлынур зи гуапэхэр; зэпымыууи жрыреӀэ: «Зиусхьэныр ин дыдэщ!»

¹⁸ Си гугъу пщӀымэ, сэ сытхьэмыщкӀэщ, мылъку сиӀэкъым, ауэ Зиусхьэныр къысхуэгумащӀэщ. Си дэӀэпыкъуэгъур, сыхэзышыжыр Уэращ; си Тхьэ! Зыкъомыгъэгувэ.