Уэрэд 38 - ХъыбарыфӀыр. ЩӀэдзапӀэр. Уэрэд ЛъапӀэхэр

38-нэ Уэрэд Къиным хэтым и гур зэӀуех

¹ Пшынауэ пашэ Едутун папщӀэ. Даут и уэрэд

² Сэ жысӀащ: си бзэгукӀэ гуэныхь сымыщӀэну, сыхуэсакъынщ си гъуэгум; цӀыху бзаджэр си пащхьэ итыху, си жьэ быдэу сӀыгъынщ.

³ Сыбзэгуащ, сымакъыншащ, зызущэхуащ, си фӀагъэ къэмыкӀуами, сигу узым хэхъуащ.

⁴ МафӀэм зэщӀищтащ си гур, мафӀэр къащӀэнащ си гупсысэхэм; абы щыгъуэ си бзэгукӀэ сыкъэпсалъэу сыхуежьащ:

⁵ Зиусхьэн, къызжеӀэ си гъащӀэр щызухынур – сыгъащӀэ махуэхэм я бжыгъэр зыхуэдизыр, пӀалъэ гъэнэхуа сызэриӀэр сыгъащӀэ.

⁶ Аращ, бжьизым хуэдэу, махуэхэр Уэ къызэптащ, УэркӀэ си гъащӀэр щымыӀагъэххэм хуэдэщ. Щыпкъэ дыдэу, дунейм тет дэтхэнэ цӀыхури зы жьыкъэшэгъуэ къудейщ.

⁷ Щыпкъэ дыдэу, ныбжь хуэдэ, цӀыхур къокӀуэкӀ; пщӀэншэуи мэлъэпхъащэ, мэугъуае, къызыхуэнэжынури имыщӀэу.

⁸ Сыт иджы гугъапӀэу сиӀэр, Зиусхьэн? ЗысшыӀэу, Уэращ сэ сызыщыгугъыр.

⁹ Хабзэншагъэу сщӀа псоми сахэшыж, акъылыншэм нэмыплъ къызремыт.

¹⁰ Сэ бзагуэ сыхъуащ, си жьэ къызэтесхыркъым – Уэ пщӀащ апхуэдэу.

¹¹ Уи удынхэр къыстумыгъэхуэж, секӀуэдылӀащи сызэрыбгъэпшынэ Ӏэм.

¹² И бзаджэщӀагъэм папщӀэ цӀыхур бгъэпшынэмэ, щыгъыныр хъуным зэрехъулӀэу, абы уасэ зыхуищӀыр уогъэкӀуэд. Аращ, дэтхэнэ цӀыхури зы жьыкъэшэгъуэщ!

¹³ Зиусхьэн, си тхьэлъэӀу къызэхэх, къыщӀэдэӀу си джэ макъым; си нэпсхэр жэуапыншэ умыщӀ. Сыту жыпӀэмэ сыгъуэгурыкӀуэ къудейщ сэ УэркӀэ, си адэжьхэм яхуэдэу, сыхэхэсщ.

¹⁴ Нэ ӀейкӀэ укъызэмыплъ, сигу гуфӀэгъуэм зэщӀищтэн лъэкӀыну, итӀанэ щӀыгур сыбгынауэ сремыпсэуж хуейми.