Уэрэд 37 - ХъыбарыфӀыр. ЩӀэдзапӀэр. Уэрэд ЛъапӀэхэр

37-нэ Уэрэд Къин зышэчым и тхьэлъэӀу

¹ Тхьэм игу зыкъэдгъэкӀыжын папщӀэ. Даут и уэрэд

² Зиусхьэн! Губжьышхуэм ухэту укъызэмыгий, сумыгъэпшынэ уи пхъэшэгъуэм.

³ Сыту жыпӀэмэ уи шабзэшэхэр къыстеуащ, уи Ӏэри къыстохьэлъэ.

⁴ Губжьу къысхууиӀэм си Ӏэпкълъэпкъым щӀыпӀэ псэу къыхинаӀакъым; гуэныхьу сиӀэхэм сагъэпсэуркъым узыншэу.

⁵ Сыту жыпӀэмэ си бзаджэщӀагъэхэр къызолъэгэкӀ, хьэлъащэ къыстехъуащ;

⁶ си акъылыншагъэм уӀэгъэу къысхуихьам фырымэр къапех, шын къокӀ.

⁷ СызэфӀэщӀауэ, сиӀу егъэзыхауэ сыщылъщ, махуэ псом сотхьэусыхэ.

⁸ Сыту жыпӀэмэ си Ӏэпкълъэпкъыр зэщӀищтащ плъыржьэр узым; щӀыпӀэ псэу къысхэнэжаӀакъым.

⁹ ГуащӀаджэ сыхъуащ, сызэхэукӀащ; си гум телъ хьэзабым сегъэщэӀу.

¹⁰ Зиусхьэн! Сэ сфӀэигъуэр уощӀэ Уэ, си щэӀу макъи пщыгъэпщкӀуакъым.

¹¹ Си гур къокӀэзызыкӀ; си гуащӀэм сибгынащ, си нитӀым я нэхуми – ари сиӀэжкъым.

¹² Си ныбжьэгъухэм, си гъусэхэм си узым пэжыжьэ защӀащ, си благъэхэри жыжьэу щытщ.

¹³ Си псэм къещэхэм ягъэув я лъахъэхэр, мыхъун къызэхъулӀэ зыфӀэигъуэхэр топсэлъыхь сызэрагъэунэхъуным, махуэ еным къысхузэхалъхьэ гухэлъ бзаджэхэр.

¹⁴ Сэ зэхэсхыркъым, дэгум сыхуэдэщ; зи жьэр къызэтезымых бзагуэм сыхуэдэщ;

¹⁵ Зэхэзымых, жэуап зымытыж цӀыхум хуэдэ сыхъуащ.

¹⁶ Сыту жыпӀэмэ, Зиусхьэн, Уэ сыпщогугъ сэ; Зиусхьэн, си Тхьэ, Уэращ жэуап езытыр.

¹⁷ Сэ жысӀащ: къысщумыгъэдыхьэшх си бийхэр; си лъакъуэхэр щӀэщӀэмэ, абыхэм зыкъысхуагъэпагэ.

¹⁸ Себэным сынэсащ сэ, си узым сибгынэркъым.

¹⁹ Бзаджагъэу сщӀар уи пащхьэ изолъхьэ, си гуэныхьым сыхущӀогъуэж.

²⁰ Лажьэ симыӀэу сызыгъэбийхэр гуащӀафӀэщ, сыхейуэ, си жагъуэгъухэр мэбагъуэ.

²¹ ФӀым пэкӀуэу, ар къызапэс, сагъэбий фӀы щӀэным сызэрыпылъым щхьэкӀэ.

²² Утыкум сыкъыумынэ, Зиусхьэн, си Тхьэ! Спэжыжьэ зумыщӀ.

²³ ДэӀэпыкъуэгъу къысхуэхъу псынщӀэӀуэу, Зиусхьэн, си КъегъэлакӀуэ!