Уэрэд 35 - ХъыбарыфӀыр. ЩӀэдзапӀэр. Уэрэд ЛъапӀэхэр

35-нэ Уэрэд ЦӀыхум и бзаджагъэмрэ Тхьэм и хьэлэлыгъэмрэ

¹ Пшынауэхэмрэ уэрэдыӀуэхэмрэ я пашэм папщӀэ. Зиусхьэным хуэӀурыщӀэ Даут и уэрэд

² ЦӀыху бзаджэм хабзэншагъэу зэрихьэм и макъ абы игу къыщоӀу, Тхьэм и фӀэлӀыкӀ илъкъым абы игу.

³ Сыту жыпӀэмэ ар зыщотхъуж, Тхьэм абы и хабзэншагъэ иужэгъуну игъуэтынукъым жеӀэ.

⁴ Абы и жьэм къыжьэдэкӀ псалъэхэр бзаджагъэщ, хьилагъэщ; акъылкӀи зекӀуэжыркъым, фӀы илэжьыжыркъым.

⁵ И гъуэлъыпӀэм абы гухэлъ бзаджэхэр щызэхелъхьэ, гъуэгу мыгъуэм тохьэ, е лэжьыным зыщидзеижыркъым абы.

⁶ Зиусхьэн! Уэ уи лъагъуныгъэ мыкӀуэдыжыр уафэхэм нос, щыпкъагъэу къытхууиӀэр пшэхэм нос!

⁷ Тхьэм и къущхьэхэм яхуэдэщ уи захуагъэр, уи хьэкумхэр хым и кууупӀэм ещхьщ! цӀыхуи былыми уахуэгумащӀэщ, Зиусхьэн!

⁸ Сыту лъапӀэ дыдэ, си Тхьэ, уи лъагъуныгъэ мыкӀуэдыжыр! Уи дамэхэм цӀыхухэм щхьэегъэзыпӀэ щӀагъуатэ;

⁹ Уи унэм и мылъкукӀэ ахэр машхэ, Уи фӀыгъэм ипскӀэ абыхэм загъэнщӀ.

¹⁰ Сыту жыпӀэмэ Уэращ гъащӀэм и къэкӀуапӀэр; Уэ уи нэхунэм щыдолъагъу дэ нэхугъэ.

¹¹ Уэ узыщӀэхэм лъагъуныгъэ мыкӀуэдыж яхуэпщӀ зэпытщ, гъуэгу захуэм ирикӀуэхэм уи фӀыгъэ ялъэӀэс зэпытщ.

¹² Къыстремыувэ цӀыху пагэм и лъакъуэ, цӀыху бзаджэм и ӀэмыщӀэ сремыхуэ.

¹³ ЯӀу егъэзыхауэ щылъщ бзаджащӀэхэр, кърадзыхащ, къэтэджыжыни ялъэкӀыркъым.