Уэрэд 34 - ХъыбарыфӀыр. ЩӀэдзапӀэр. Уэрэд ЛъапӀэхэр

34-нэ Уэрэд Хьэзаб хэт цӀыхум и тхьэлъэӀу

Даут и уэрэд

¹ Сызыгъэбийхэр гъэбий, Зиусхьэн, къызэбэнхэм ебэн.

² МэӀури афэджанэри къащти, дэӀэпыкъуэгъу къысхуэхъу.

³ Бжыри уэщри къэӀэти, сыкъезыхуэкӀхэм ебэн; си псэм къыжеӀэ: «Сэращ ухэзышыжынур!»

⁴ ЕмыкӀу кърехь, напэншэ ирехъу си псэм къещэхэр; зэщӀрекӀуэж, я напэр трырекӀ, зигу бзаджагъэ къысхуихьэхэр.

⁵ ЩӀым жьыбгъэм щызэрихьэ къэрэкъурэм хуэдэ ирехъу ахэр, Зиусхьэным и мелыӀычым ирырехужьэ.

⁶ КӀыфӀ, цӀэнтхъуэрыгъуэ ирехъу абыхэм я гъуэгур, Зиусхьэным и мелыӀычым кърырехуэкӀ.

⁷ Сыту жыпӀэмэ лажьэ симыӀэу сэр папщӀэ абыхэм щӀауфащ я хъыр; лажьэ симыӀэу, мащэ схуатӀащ абыхэм.

⁸ Ажалыр къахурес абыхэм уащхъуэдэмыщхъуэу; сэр папщӀэ щӀауфа хъым езыхэр ирехуэж; ирехуэж абы икӀуэдэну.

⁹ Зиусхьэным гуфӀэгъуэ хэзгъэгъуэтэнщ абы щыгъуэ; абы сыкъригъэлащи, сыхуэгуфӀэнщ.

¹⁰ СигукӀи си псэкӀи жысӀэнщ: «Зиусхьэн! Хэт Уэ пхуэдэр – гуащӀаджэр лъэщым ӀэщӀэзыхыу, тхьэмыщкӀэмрэ зыри зимыӀэхэмрэ зыужьыгуахэм къаӀэщӀэзыхыжыр?»

¹¹ Щыхьэт нэпцӀхэр къыспэуващ сэ: сызыщымыгъуазэхэмкӀэ сагъэкъуаншэ.

¹² Си фӀыщӀагъэм бзаджагъэр къыпагъэуври, сигу ягъэкӀуэд.

¹³ Ахэр щысымаджэм щыгъуэ щыгъынхэр зыщыстӀагъэри, гугъу задезгъэхьащ, сынэщӀурэ Тхьэм сахуелъэӀуащ, си щхьэ ухуауэ.

¹⁴ Си ныбжьэгъу, си къуэш сахуэщыгъуэ хуэдэу, садызекӀуащ; си анэ щхьэкӀэ сыщыгъуэ хуэдэу, сыкъекӀуэкӀащ, си щхьэ ухуауэ, сынэщхъейуэ сахэтащ.

¹⁵ Ауэ сэ сыщылъэпэрапэм, ахэр гуфӀэурэ зэгухьэжащ; къысщыдыхьэшхыурэ, зэщӀыгъуу саубурэ, фӀеягъэу къысхужаӀэнум гъунэ хуащӀакъым.

¹⁶ УкӀытэ ямыӀэу, щӀэнэкӀалъэ сащӀ зэпытащ, я дзэхэр къысхузэрагъэшхащ.

¹⁷ Зиусхьэн! Сыт хуэдизрэ уеплъыну абы? Я залымыгъэхэм саӀэпыхыж, си гъащӀэр ящыхъумэ аслъэнхэм.

¹⁸ Уи щытхъу щыжысӀэнщ зэӀущӀэшхуэм, цӀыху Ӏувым сыхэту щытхъу щыпхужысӀэнщ сэ.

¹⁹ Сэ сызыгъэбий хьилэшыхэр си насыпыншагъэ щремыгуфӀыкӀ, сыхьэкъыншэу си жагъуэгъухэр си тхьэмыщкӀагъэм иремыгъэгуфӀэ.

²⁰ Сыту жыпӀэмэ ахэр зылъыхъур зэгурыӀуэныгъэкъым; щӀыгум мамыру тетхэм пэувауэ, хьилагъэхэр зэхалъхьэ абыхэм.

²¹ Я жьэхэр къыстраунащӀэ; жаӀэ: «Дэгъуэщ! Дэгъуэщ! Ди нэкӀэ тлъэгъуащ пщӀахэр».

²² Уэ плъэгъуащ, Зиусхьэн, зумыущэху, спэжыжьэ зумыщӀ, Зиусхьэн!

²³ Сыкъэлъагъу, си хьэкъ къызэптыну, къэтэдж, си дэуэгъум сыщыпхъумэну, си Тхьэ, си Зиусхьэн!

²⁴ Уэ щыпкъагъэу пхэлъымкӀэ си хеягъэ къыхэгъэщ, Зиусхьэн, си Тхьэ, си тхьэмыщкӀагъэ щремыгуфӀыкӀ.

²⁵ ЯгукӀэ жремыӀэ: «Дэгъуэщ! Дигу тепщэхащ». Абыхэм жремыӀэ: «Абы и Ӏуэху дыухащ».

²⁶ ЕмыкӀу кърехь, напэншэ ирехъу си насыпыншагъэ щыгуфӀыкӀхэр; укӀытэм, емыкӀум хрырет къыспэувауэ зызыгъэинхэр.

²⁷ Си хеягъэ къыхэщыну хуейхэр ирегуфӀэ, иренэжэгужэ, зэпымыууэ жрыреӀэ: «Езым хуэӀурыщӀэм фӀыгъуэ игъуэтыным щыгуфӀыкӀ Зиусхьэныр инщ!»

²⁸ Уэ уи щыпкъагъэрэ уи щӀыхьрэ си бзэгум махуэ еным иӀуэтэнщ.