Уэрэд 33 - ХъыбарыфӀыр. ЩӀэдзапӀэр. Уэрэд ЛъапӀэхэр

33-нэ Уэрэд Тхьэм и захуагъэм и щӀыхь

¹ И акъыл имытыж хуэдэу Абимэлэк и пащхьэм зыкъыщищӀри, абы деж кърахуу щыхыхьэжым, Даут иуса уэрэд.

² Сыт хуэдэ уахътыи щӀыхь хуэсщӀынщ Зиусхьэным; Абы и щӀыхьыр си бзэгу телъ зэпытынщ.

³ ЗиусхьэнымкӀэ зыщытхъужынщ гууэ сиӀэр, къызэхахынщи, къэгуфӀэнщ хэутэн ящӀа цӀыхухэр

⁴ ФысщӀыгъуу вгъэлъапӀэ Зиусхьэныр, и цӀэр лъапӀэу къэдвгъэӀэт дызэгъусэу.

⁵ Зыхуэзгъэзащ сэ Зиусхьэным, Абы жэуап къызитри, шынагъуэу сиӀэ псоми саӀэщӀихыжащ.

⁶ Зи нэплъэгъуэ Абы хуэзыгъазэхэм я нэгум нэхунэр щӀэзщ, напэншэ хъункъым ахэр.

⁷ Мы тхьэмыщкӀэр Тхьэм елъэӀуащ, Зиусхьэным ар къызэхихри, и къин псоми яхишыжащ.

⁸ Зиусхьэным фӀэлӀыкӀ хузиӀэхэр къехъумэ Абы и мелыӀычым, яхешыж къиныгъэу яӀэм.

⁹ Зиусхьэныр зыхуэдэр фыуплъэкӀуи, зэрыфӀыр флъагъунщ. Гъуэгу махуэ теуващ щхьэегъэзыпӀэкӀэ Абы зыхуэзыгъазэр.

¹⁰ Зиусхьэным и фӀэлӀыкӀ фигу ивгъэлъ фэ, Абы и цӀыху лъапӀэхэм, сыту жыпӀэмэ Абы щышынэхэр зыми хуэныкъуэкъым.

¹¹ Аслъэн шырхэм щыщӀагъэ яӀэщ, мэмэжалӀэ, ауэ Зиусхьэным зыхуэзыгъазэр сыт хуэдэ фӀыгъэми щыщӀэркъым.

¹² НыбжьыщӀэхэр си деж фыкъакӀуи, фыкъызэдэӀу, Зиусхьэным фӀэлӀыкӀ хувиӀэну сэ фызгъэсэнщ.

¹³ Псэун фӀэигъуэу, фӀыгъуэр игъуэтын папщӀэ, гъащӀэ кӀыхь иӀэным щӀэмыхъуэпс цӀыху щыӀэ?

¹⁴ Уи бзэгум жомыгъэӀэ бзаджагъэ, уи жьэм къыжьэдумыгъэкӀ хьилагъэхэр.

¹⁵ Бзаджагъэм зыщыдзей, фӀыгъэр щӀэ; мамырыгъэм зыхуэгъази, и ужь ихьэ!

¹⁶ Зиусхьэным и нэхэр Езым хуэщыпкъэхэм яхуэгъэзащ, и тхьэкӀумэхэр – я джэ макъым.

¹⁷ Ауэ Зиусхьэным и нэгу яхуигъазэркъым бзаджащӀэхэм – игъащӀэкӀэ ахэр ягу къащымыкӀыжынхэу щӀыгум.

¹⁸ Езым хуэщыпкъэхэр къадэӀэпыкъуну щелъэӀукӀэ, Зиусхьэным ахэр зэхех, я тхьэмыщкӀагъуэ псоми хешыж.

¹⁹ Зиусхьэныр япэблагъэщ зигу кӀуэдахэм, зигукӀэ зэхэукӀахэр Абы къиныпӀэм кърешыж.

²⁰ Тхьэм хуэщыпкъэм къину ишэчыр бэ мэхъу, ауэ а псоми ар яхешыж Зиусхьэным.

²¹ Абы и къупщхьэхэм Ар яхуосакъ: абыхэм ящыщ гуэри къутэнкъым.

²² Ем екӀуэдылӀэнщ цӀыху бзаджэр; Тхьэм щыпкъагъэ хузиӀэр зылъагъу мыхъухэм я мысагъэ къалъысыжынщ.

²³ Езым хуэӀурыщӀэхэм я щхьэр ещэхуж Зиусхьэным, щхьэегъэзыпӀэу Абы зыхуэзыгъазэхэр игъэкъуэншэнукъым.