Уэрэд 31 - ХъыбарыфӀыр. ЩӀэдзапӀэр. Уэрэд ЛъапӀэхэр

31-нэ Уэрэд Гуэныхьхэм уахущӀегъуэжынымрэ ахэр Тхьэм къыпхуигъэгъунымрэ

Даут и уэрэд. АкъылыфӀагъэм и уэрэд

¹ Гъуэгу махуэ теуващ зи хабзэншагъэ зыхуигъэгъуу, зи гуэныхьыр Тхьэм зыхуигъэкӀуэдар.

² Гъуэгу махуэ теуващ Зиусхьэным бзаджагъэ зыхуимылъагъур, зигу хьилагъэ имылъыр!

³ Си гуэныхьыр зэрызущэхуам махуэ енкӀэ сигъэщэӀуурэ си къупщхьэр щыным нэсащ.

⁴ Сыту жыпӀэмэ жэщми махуэми уи Ӏэр сэ къыстехьэлъэ зэпытащ, гуащӀэу схэлъри, гъэмахуэ уэгъум игъэхуэлакъэ жыпӀэну, сӀэщӀэкӀуэдащ.

⁵ Ауэ сэ гуэныхьу сщӀар уэсхьэлӀащ, бзаджагъэу сщӀари пщызущэхуакъым; сэ жысӀащ: «Зиусхьэным и пащхьэ ислъхьэнщ си хабзэншагъэхэр», абы щыгъуэ си гуэныхьыр схуэбгъэгъури, си къуаншагъэр Уэ сщхьэщыпхащ.

⁶ Абы папщӀэ, игъуэм деж, Тхьэм фӀэлӀыкӀ хузиӀэ дэтхэнэри кърелъэӀу, абы щыгъуэ, псышхуэхэр къыщиукӀэ, ахэр абы къылъэӀэсынкъым.

⁷ Уэ – узихъумапӀэщ; къин сыхэхуэмэ, сыкъыбохъумэ, сызэрыхэпшыжым и гуфӀэгъуэм сыхыбогъэт.

⁸ «Акъыл уэзгъэщӀэнщ, гъуэгуу узэрыкӀуэнур уэзгъэщӀэнщ, къыбгурызгъэӀуэнщ, си нэӀэ птезгъэтурэ».

⁹ «Шым, къыдыру зэхэщӀыкӀ зимыӀэм фахуремыдэ, ӀурыщӀэ пхуэхъун папщӀэ, зи жьэпкъым шхуэӀу жьэдэлъхьэн хуейм хуэдэу».

¹⁰ ЦӀыху бзаджэм къиныгъэр къобэкӀ, ауэ Зиусхьэным щыгугъым фӀыгъуэр къещӀэкӀащ.

¹¹ Зиусхьэныр фигу илъу фыгуфӀэ, фыгуфӀэ щыпкъагъэ зиӀэхэр; гуфӀэгъуэшхуэм фыхэту, зигукӀэ захуагъэ зиӀэ псоми Зиусхьэным щӀыхь хуэфщӀ макъ ӀэтакӀэ!