Уэрэд 30 - ХъыбарыфӀыр. ЩӀэдзапӀэр. Уэрэд ЛъапӀэхэр

30-нэ Уэрэд Тхьэм ущыгугъыным и тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² Уэ, Зиусхьэн, щхьэегъэзыпӀэ узощӀ, емыкӀу къызремыхь игъащӀэкӀэ, гугъуехьым сыхэшыж уи щыпкъагъэкӀэ.

³ Уи тхьэкӀумэр къысхуэгъази, къиным сыкъыхэшыж псынщӀэӀуэу, Уэ абрэмывэ хъумапӀэ, быдапӀэ лъэщ къысхуэхъу.

⁴ Сыту жыпӀэмэ Уэ умывэбгщ, убыдапӀэщ сэркӀэ, уи цӀэм и хьэтыркӀэ сызешэ сэ, сыгъэӀурыщӀэ.

⁵ Щэхуу къысхуагъэува хъым сыкъишыж, си щхьэегъэзыпӀэр Уэращи.

⁶ Уи ӀэмыщӀэ зызолъхьэ; си щхьэр къэпщэхужащ Уэ, Зиусхьэн, Тхьэуэ сызыщыгугъ.

⁷ Сэ слъагъу хъуркъым тхьэ мыфэмылхэр зыгъэлъапӀэхэр, сэ сызыщыгугъыр Зиусхьэнырщ.

⁸ СигъэгуфӀэнущ сэ уи лъагъуныгъэ мыкӀуэдыжым, дэрэжэгъуэ къызитынущ, сыту жыпӀэмэ къэплъэгъуащ си тхьэмыщкӀагъэр, си къинхэм уащыгъуазэщ Уэ.

⁹ Си бийхэм я ӀэмыщӀэ сиплъхьакъым; си лъэр хуиту бгъэуващ.

¹⁰ ГущӀэгъу къысхуэщӀ, Зиусхьэн, сыту жыпӀэмэ гузэвэгъуэм сызэлъиубыдащ; нэщхъеягъуэм иригъэгъукӀащ си нэр, сигури си Ӏэпкълъэпкъри гъуащ.

¹¹ Нэщхъеягъуэм еух си гъащӀэр си илъэсхэр – гызын, щэӀуным, къарууншэ сащӀащ си къинхэм, мэщащэ си къупщхьэхэр.

¹² Си бийхэми си гъунэгъу дыдэхэми – псоми сауб, си нэӀуасэхэмкӀи шынагъуэ сыхъуащ: уэрамым къыщызихьэлӀэхэр збгъэдож.

¹³ ЛӀам хуэдэу сащыгъупщащ; хьэкъущыкъу къутам сыхуэдэщ.

¹⁴ Сыту жыпӀэмэ цӀыху куэд зэӀущащэу зэхызох; шынагъуэр къызобгъэрыкӀуэ лъэныкъуэ псомкӀи, сэ къысхущӀэбжэу зэрыгъэӀущыжурэ, си псэр хахыну зэгуроӀуэ.

¹⁵ Ауэ Уэ сыпщогугъ, Зиусхьэн; сэ жызоӀэ: «Сэ си Тхьэр Уэращ».

¹⁶ Си махуэхэр Уи Ӏэ илъщ; си бийхэми сыкъезыхуэкӀхэми саӀэщӀэхыж.

¹⁷ Уи нэгум и нэху сэ, уи ӀурыщӀэм, къыстегъапсэ, Уи лъагъуныгъэ мыкӀуэдыжкӀэ сымыкӀуэду сыкъегъэл.

¹⁸ Зиусхьэн! ЕмыкӀу къызумыгъэхь, сызэлъэӀур Уэращ: бзаджащӀэхэм кърехь емыкӀу, хьэдрыхэ бзэншэм ирекӀуэ.

¹⁹ Бзэгузехьэ пцӀыупсхэр бзагуэ ирехъу – пагэхэу, Тхьэм хуэщыпкъэхэр кърамыдзэу, мыхъун хужызыӀэхэр.

²⁰ Уэ узыгъэлъапӀэхэм папщӀэ сыту бэ фӀыгъэу Уэ уиӀэр, цӀыхухэм я пащхьэкӀэ щхьэегъэзыпӀэу Уэ зыкъыпхуэзыгъазэхэм папщӀи бгъэхьэзырауэ.

²¹ Уэ ахэр бырсыр къэзыӀэтхэм уи нэгу щӀэту ящыбохъумэ, убакӀуэхэр къомыгъэгуэуэну хъумапӀэ ябогъэгъуэт.

²² Зиусхьэным щӀыхь хузощӀ, бийхэр зытебанэ къалэм сыщыщыӀам, и лъагъуныгъэ мыкӀуэдыж щӀагъуэр къыслъигъэӀэсащи.

²³ Гузэвэгъуэм сыхэту жысӀэгъащ сэ: «Сыкъипхуащ уи Ӏэгъуэблагъэм», ауэ укъыздэӀэпыкъункӀэ сыныщолъэӀум, си лъэӀу макъ къызэхэпхащ.

²⁴ Фэ, Тхьэм и цӀыху лъапӀэ псоми, фӀыуэ флъагъу, Зиусхьэныр; Зиусхьэным къехъумэ хуэщыпкъэхэр, ауэ пагэу зекӀуэхэр егъэпшынэ Абы ирикъун хуэдизкӀэ.

²⁵ Зывгъэбыдэ, лӀыгъэ зыхэвгъэлъ Зиусхьэным пэплэхэм, щыгугъхэм!