Уэрэд 28 - ХъыбарыфӀыр. ЩӀэдзапӀэр. Уэрэд ЛъапӀэхэр

28-нэ Уэрэд Тхьэм и макъ лъэщыр

Даут и уэрэд

¹ Фэ, уафэм щыпсэухэ, хуэвгъэфащэ Зиусхьэным, хуэвгъэфащэ Абы щӀыхьри къарури.

² Хуэвгъэфащэ Зиусхьэным и цӀэм щӀыхь, фащэ лъапӀэр фщыгъыу, Зиусхьэным щхьэщэ хуэфщӀ!

³ Псыхэм ящхьэкӀэ Зиусхьэным и макъ къыщоӀу; Тхьэуэ щӀыхь зиӀэм и макъыр щыблэ макъым хуэдэщ. Зиусхьэным и макъыр псы куэдым ящхьэкӀэ итщ.

⁴ Зиусхьэным и макъыр лъэщщ, Зиусхьэным и макъыр щӀыхьзехьэщ.

⁵ Ашэ жыгхэр Зиусхьэным и макъым ирещӀыкӀ; Зиусхьэным и макъым ирещӀыкӀ Ливан къущхьэм тет ашэхэр.

⁶ Егъэджэгу, танэ хуэдэу, Ливан къущхьэхэр, Сирион къущхьэхэри – выщӀэм хуэдэу.

⁷ МафӀэ хъуаскӀэхэр къахегъэлъэт Зиусхьэным и макъым.

⁸ Зиусхьэным и макъым губгъуэ нэщӀыр егъэзджыздж; Зиусхьэным Кадеш губгъуэ нэщӀыр егъэгулэз.

⁹ Зиусхьэным и макъым жыгейхэр егъэсыс, мэзхэр еупцӀэн; Абы и унэ лъапӀэм щӀэс псоми щӀыхьышхуэ хуащӀ Абы.

¹⁰ Псыдзэхэм ящхьэжкӀэ и тахътэм тесщ Зиусхьэныр; Зиусхьэныр пащтыхь тахътэм игъащӀэм тесщ.

¹¹ Зиусхьэным и цӀыху лъэпкъым гуащӀэ кърырет; Зиусхьэным и цӀыху лъэпкъым мамыркӀэ къыщрехуэ и нэфӀ.