Уэрэд 26 - ХъыбарыфӀыр. ЩӀэдзапӀэр. Уэрэд ЛъапӀэхэр

26-нэ Уэрэд ЩӀыхь тхьэлъэӀу

Даут и уэрэд

¹ Зиусхьэныр си нэхунэщ, си КъегъэлакӀуэщ: хэт сызыщышынэнур? Зиусхьэныр си гъащӀэм и хъумапӀэщ: хэт шынагъэ зыхузиӀэнур?

² БзаджащӀэхэр, си пэрыуэгъухэри си бийхэри, къыстобанэ, сызэпкъратхъыну; лъэпэрэпэнхэщи, джэлэнщ ахэр.

³ Дзэр къызэбгъэрыкӀуэми, сышынэнкъым, сигу къэдзыхэнкъым, къыспэтэджми зауэр – абы щыгъуэми сиӀэнщ гугъэ.

⁴ Зызакъуэщ сэ Зиусхьэным сызэрелъэӀур, зызакъуэщ дапщэщи сызылъыхъур: къэзгъэщӀэну махуэхэм я кӀуэцӀкӀэ сыщыпсэуну Зиусхьэным и унэм, Зиусхьэным и фӀыгъэ слъагъуну, Ар и унэ щызгъэлъэпӀэну.

⁵ Сыту жыпӀэмэ махуаем щхьэегъэзыпӀэ схуэхъунурэ, сыщихъумэнщ, и шэтырым сыщӀигъэпщкӀуэнщ, абрэмывэм сыдрихьеинщ шынагъуэншэу.

⁶ Си бийхэу сыкъэзыувыхьхэм ящхьэкӀэ сыщысӀэтынщ итӀанэ, сэри Абы и шэтырым гуфӀэгъуэ макъышхуэкӀэ щысщӀынщ къурмэнхэр, Зиусхьэным уэрэд хужысӀэурэ, и щӀыхь сӀуэтэнщ.

⁷ Къызэхэх, Зиусхьэн, си макъыу сынызэроджэр; гущӀэгъу къысхуэщӀи, жэуап къызэт.

⁸ Уэ жыпӀэгъащ: «Сэ сызыхуэдэр зэвгъащӀэ». Си гум къызжиӀащ Уэр папщӀэ: «Зиусхьэн, узыхуэдэр зэзгъэщӀэнщ».

⁹ СщумыгъэпщкӀу уи нэгу; губжьым ухэту, сэ, уи ӀурыщӀэр, ӀэщӀыб сумыщӀ. ДэӀэпыкъуэгъуу узиӀащ Уэ; сыхыфӀумыдзэ, сыкъомыбгынэ, Тхьэуэ си КъегъэлакӀуэ!

¹⁰ Сыту жыпӀэмэ си ани си ади сыкъабгынами, Зиусхьэным сызришэлӀэнщ.

¹¹ Уи гъуэгур сыгъащӀэ, Зиусхьэн, си бийхэм сащыпхъумэну, гъуэгу захуэм сытегъэхьэ:

¹² къыспэувхэм саӀэщӀумыгъахуэ, щыхьэт нэпцӀхэр къыспэтэджащи, абыхэм ягу къысхуоплъ.

¹³ Ауэ псэ зыпытхэм я щӀыгум Зиусхьэным и фӀыщӀагъэр зэрыщыслъагъунур си фӀэщ мэхъу.

¹⁴ Зиусхьэным щыгугъ, зыгъэбыдэ, уигури иребыдэ, Зиусхьэным щыгугъ, зышыӀэ.