Уэрэд 21 - ХъыбарыфӀыр. ЩӀэдзапӀэр. Уэрэд ЛъапӀэхэр

21-нэ Уэрэд Гузэвэгъуэ джэ макърэ щӀыхь уэрэдрэ

¹ УэрэдыӀуэхэмрэ пшынауэхэмрэ я пашэм папщӀэ. Нэхущыгъуэм деж къэлъагъуэ мэз бжэным ехьэлӀа уэрэдым и макъамэр щӀэлъу жаӀэ. Даут и уэрэд

² Си Тхьэ! Си Тхьэ! Сыт щхьэкӀэ сыкъэббгына Уэ? Сыт щхьэкӀэ спэжыжьэ ухъуа, Сыт щхьэкӀэ сыкъыумыгъэлрэ, си гухэщӀ макъ зэхыумыхрэ?

³ Си Тхьэ! Сыгызурэ, сыноджэ махуэм, арщхьэкӀэ Уэ жэуап къызэптыркъым; жэщри аращ – згъуэтыркъым гупсэхугъуэ.

⁴ Ауэ Уэ улъапӀэщ, тахътэм утесу, израил цӀыхухэм щӀыхь къыпхуащӀ.

⁵ Ди адэжьхэр Уэ къыпщыгугъащ; хэкӀыжащ, къыпщыгугъти;

⁶ ахэр Уэ къоджати, псэууэ къэнэжащ; Уэ къыпщыгугъырти, щӀебгъэгъуэжакъым ахэр.

⁷ СыхьэпӀацӀэщ сэ, сыцӀыхукъым, цӀыхухэм нэмыплъ къызат, лъэпкъым сызэрипэсыркъым.

⁸ Сыкъэзылъагъу псори къысщодыхьэшх, я нэщхъ къысхузэхалъхьэурэ, я щхьэхэр ягъэсыс.

⁹ «Мыр Зиусхьэным щыгугъащи, хрешыж, игу къыхуэфӀмэ, кърырегъэл», – жаӀэ абыхэм.

¹⁰ Уэращ сыкъизышар ныбэ кӀуэцӀым, си анэм и бгъафэ сыщыщӀэлъам, укъысхуэсакъащ.

¹¹ Ныбэм сыкъызэрикӀыу, Уэ сыппэщӀэхуащ; си анэ и ныбэ сыкъыщикӀам щыублауэ Уэращ си Тхьэр.

¹² Спэжыжьэ зумыщӀ; нэщхъеягъуэр благъэщ, дэӀэпыкъуэгъуи щыӀэкъым.

¹³ Танэжь куэдым сыкъаувыхьащ; Башан и танэжь лъэщ куэдым сыкъаухъуреихьауэ,

¹⁴ аслъэным хуэдэу, я жьэ ущӀауэ, къызжьэхэпхъуэурэ мэгъуахъуэ.

¹⁵ Сэ, псым хуэдэу, сикӀутащ; си къупщхьэхэр псори зэрыпкӀам хуэдэщ, си гур шэхум хуэдэ хъуащ, си бгъэм илъ гур ткӀуащ.

¹⁶ Хьэкъущыкъу къутам хуэдэу, си джийр гъущӀащ, си бзэгур си джийм епщӀыжащ, ажалым и сабэ сыхъуным нэмыщӀ, Уэ къысхуэбгъэнэжаӀакъым.

¹⁷ Аращ, сыкъаувыхьащ хьэхэм, цӀыху ябгэхэм сыкъаухъуреихьащ, си Ӏэхэм, си лъакъуэхэм къахэпыджащ.

¹⁸ Къэплъытэн плъэкӀыни си къупщхьэхэр, ауэ си бийхэр къызоплъ, я нэхэр къыстраубыдауэ къызоплъ.

¹⁹ Си щыгъынхэр зэхуагуэш, си фащэхэм папщӀэ пхъэидзэ ящӀ.

²⁰ Ауэ Уэ спэжыжьэ зумыщӀ, Зиусхьэн, Уэращ си щӀэгъэкъуэныр! укъыздэӀэпыкъуну къэпӀащӀэ;

²¹ си псэр щыхъумэ джатэм, хьэхэм ящыхъумэ си гъащӀэр.

²² Аслъэным и жьэм сыкъыжьэдэхыж, вы Ӏэлым и бжьэм сыфӀумыгъахуэ.

²³ Си лъэпкъэгъухэм уи хъыбар езгъэщӀэнщ, цӀыху зэхуэсым уи щӀыхь щысӀуэтэнщ.

²⁴ Зиусхьэным фӀэлӀыкӀ хузиӀэхэ, Абы щӀыхь хуэфщӀ! Екъуб и лӀэужьхэ, Абы и щӀыхь фӀуатэ! Израил лъэпкъым зэрыщыту Абы фӀэлӀыкӀ хувиӀэ!

²⁵ Сыту жыпӀэмэ хэутэн ящӀам Абы нэмыплъ къритакъым, и нэгу щигъэпщкӀуакъым, ауэ зэхихащ и макъ дэӀэпыкъуныгъэкӀэ ар къыщелъэӀум.

²⁶ Зэхуэсышхуэм зи щӀыхь щысӀуатэр Уэращ; Уэ фӀэлӀыкӀ къыпхуизыӀэхэм я пащхьэм псалъэу стар щызгъэзэщӀэжынщ.

²⁷ ТхьэмыщкӀэхэр шхэнщ икӀи загъэнщӀыжынщ; Зиусхьэным зыхуэзыгъазэхэр Абы щретхъу; гъащӀэ кӀыхь, насыпыфӀэ ирехъу ахэр!

²⁸ ЩӀыгум и къуапэ псоми Зиусхьэныр ягу къыщыкӀыжынщи, Абы зыкъыхуагъэзэнщ; цӀыху лъэпкъ мащӀэ псоми Абы и пащхьэ щхьэщэ щащӀынщ.

²⁹ Сыту жыпӀэмэ тепщэныгъэшхуэ зиӀэр Зиусхьэныращ, Абы и ӀэмыщӀэм илъщ цӀыху лъэпкъхэр.

³⁰ ЗыкъызыфӀэщӀыжауэ щӀыгум тет псоми щхьэщэ хуащӀынщ Абы; хьэдрыхэ кӀуэжыну псоми щхьэщэ хуащӀынщ Абы; ауэ Зиусхьэным и фӀыгъэкӀэ сэ сыпсэунщ.

³¹ Къэхъуну цӀыхухэри хуэлэжьэнщ Абы, къэкӀуэну щӀэблэхэм Зиусхьэным и хъыбар хуаӀуэтэнщ.

³² ДяпэкӀэ къэхъуну цӀыхухэм жраӀэнщ Зиусхьэным захуагъэу хэлъыр. Сыту жыпӀэмэ Зиусхьэныращ ар зи ӀэщӀагъэр.