Уэрэд 18 - ХъыбарыфӀыр. ЩӀэдзапӀэр. Уэрэд ЛъапӀэхэр

18-нэ Уэрэд Зиусхьэным и хабзэ

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² Тхьэм и щӀыхьыр яӀэт уафэхэм, и ӀэщӀагъэм и хъыбар еӀуатэ уафэлъащӀэм.

³ Тхьэм и щӀыхьыр зы махуэм адрей махуэм лъегъэӀэс, зы жэщым адрей жэщым ирегъащӀэ Тхьэм и хъыбар.

⁴ ЩыӀэкъым бзэ, щыӀэкъым псалъэ, абыхэм я макъ къэӀуркъым.

⁵ Абыхэм я макъыр къыщокӀуэкӀ зэрыщӀыгуу, я псалъэхэр дуней гъунапкъэхэм нос. Дыгъэм и псэупӀэр Тхьэм абыхэм яхигъэуващ.

⁶ КъэзышагъащӀэр и фызыр зэрыс унэм къызэрикӀым хуэдэу, ар къыкъуокӀ, цӀыху жэру къэжапӀэр къызэрижыхьынум щыгуфӀыкӀым хуэдэу.

⁷ Ар зы уафэ гъунэм къыщожьэ, адрей уафэ гъунэм нэсу къекӀухь, и хуабэ здынэмыс щыӀэкъым.

⁸ Зиусхьэным игъэува хабзэр щыщӀагъэншэщ, уи гум и гуащӀэр егъэбыдэ, Зиусхьэным и псалъэ гъуазэр щыпкъэ защӀэщ, цӀыху къызэрыгуэкӀхэр абы акъылыфӀэ ещӀ.

⁹ Зиусхьэным пщэрылъ къытхуищӀхэр тэрэзщ, гур ягъэжан, Зиусхьэным и унафэхэр нэхунэщ, уагъэлъагъу щӀэныгъэр.

¹⁰ Зиусхьэным и фӀэлӀыкӀ къабзэщ, игъащӀэкӀэ щыӀэнущ ар. Зиусхьэным и хьэкумыр щыпкъагъэщ икӀи захуагъэщ.

¹¹ Тхьэм и хьэкумхэр дыщэм хуэдэщ, уеблэмэ дыщэ къабзэ куэд дыдэм йофӀэкӀ, фохьэкум нэхърэ нэхъ ӀэфӀщ.

¹² Уэ уи ӀурыщӀэр абыхэм ягъасэ, уагъэгъуазэмэ абыхэм – аращ ӀыхьэфӀыр.

¹³ Хэт зи дагъуэхэр зыдэзыщӀэжыр? ЗыдэзмыщӀэж дагъуэхэмкӀэ сыгъэкъабзэ.

¹⁴ ЗыдэсщӀэж гуэныхьхэм сэ, уи ӀурыщӀэр, сащыхъумэ – абыхэм я Ӏэ илъ сымыхъуну. Абы щыгъуэм сызэрагъэкъуэншэн гуэри збгъэдэлъынкъым, гуэныхьышхуэхэмкӀи сыкъэбзэнщ.

¹⁵ Си жьэм къыжьэдэкӀ псалъэхэри сигу илъхэри Уэ уигу ирихьын ирехъу, Зиусхьэн, Уэращ сыкъэзыхъумэ абрэмывэри си щхьэ къэзыщэхужари.