Уэрэд 17 - ХъыбарыфӀыр. ЩӀэдзапӀэр. Уэрэд ЛъапӀэхэр

17-нэ Уэрэд ТекӀуэныгъэм ехьэлӀа уэрэд

1 УэрэдыӀуэхэмрэ пшынауэхэмрэ я пашэм папщӀэ. Даут и уэрэд

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд Зиусхьэным и ӀурыщӀэ Даут, Зиусхьэным ар Шаули адрей и бий псоми емыкӀуэдылӀэну щащихъумэм, Зиусхьэным хуэкӀуэу мы уэрэдым хэлъ псалъэхэр мыпхуэдэу жиӀащ:

² Уэ фӀыуэ узолъагъу, Зиусхьэн, Уэращ къару къызэзытыр.

³ Зиусхьэныращ сыкъэзыхъумэ абрэмывэ быдапӀэу сиӀэр, бийхэм саӀэщӀэзыхыр, си Тхьэр – си къуршу щхьэегъэзыпӀэу сиӀэр, си мэӀур, сыкъезыгъэл гуащӀэшхуэр, си щтапӀэр.

⁴ ЩӀыхь зыхуэфащэ Зиусхьэным селъэӀуащи, саӀэщӀехыж си бийхэм.

⁵ Ажал лъахъэм сахузри, псы уэр ябгэм сапхъуэтащ.

⁶ Хьэдрыхэ лъахъэм зыкъызашэкӀащ, сихуащ ажалым и хъым.

⁷ ЩӀыпӀэ зэвым сихуауэ, Зиусхьэным зыхуэзгъэзащ, си Тхьэм селъэӀуащ къыздэӀэпыкъуну. И унэшхуэм ису, Абы си макъ зэхихащ, лъэӀэсащ Абы си джэ макъыр.

⁸ ЩӀыгур къэсысри, къэлъэлъащ, къущхьэ лъащӀэхэр къэтхытхри, къэкӀэзызащ, Тхьэр къэгубжьащи.

⁹ Абы и губжьым зыкъригъэӀэтащ пшэсым, и жьэм къыжьэдэкӀащ узыхь мафӀэр; мафӀэлыгъэр Абы къиутхащ.

¹⁰ Ар къехащ, уафэр къиблэрэкӀри, Абы и лъэгу щӀагъым кӀыфӀыбзэ щыхъуащ.

¹¹ Къэрыубым тетӀысхьэщ, зиӀэтри, лъэтащ Ар, жьым и дамэм Ар ирихьэжьащ.

¹² КӀыфӀыр тепӀэн зыхуищӀащ Абы, псыр зыхэз уафапшэ Ӏувхэр Абы зришэкӀащ.

¹³ Абы и нэхунэ кӀэрыкӀащ пшэхэр зэрызехьэу, мафӀэстхъумрэ уэфымрэ къахэтакъуэу.

¹⁴ Къыщыгъуэгъуащ Зиусхьэныр уафэгум, Псоми я нэхъ Лъагэм и макъ къигъэӀуащ.

¹⁵ КъиутӀыпщри и шабзэшэхэр къатрипхъащ и бийхэм, ирикъухьащ ахэр бжыкӀэ.

¹⁶ Хым и щӀэр къэлъэгъуащ, дунеишхуэм и лъабжьэхэр къыщӀигъэщащ, уи бийхэм уащыхуэгубжьым, уи гъуагъуэ макъкӀэ уащыхуилъым, Зиусхьэн.

¹⁷ И Ӏэр лъагапӀэм къришиехащ, сиубыдри сыкъыхишыжащ Абы псы уэрхэм.

¹⁸ Си бий лъэщхэм саӀэпихащ, сызылъагъу мыхъуу сэр нэхъ гуащӀэшхуэхэм сащихъумащ.

¹⁹ ТхьэмыщкӀагъэм сыщыхэт махуэм абыхэм зыкъыспаӀэтащ сэ, ауэ Зиусхьэныр щӀэгъэкъуэну сиӀащ.

²⁰ ЩӀыпӀэ Ӏэхуитлъэхуит сыкъришэри, сэ Абы сыкъригъэлащ: сыту жыпӀэмэ сэ Абы игу срохь.

²¹ Щыпкъагъэу хузиӀам пэкӀуэу, Зиусхьэным фӀы къысхуищӀащ; си къабзагъэм хуэфащэ фӀы къысхуищӀащ.

²² Сыту жыпӀэмэ сэ Зиусхьэным и гъуэгухэм сахуэщыпкъэщ, си Тхьэм и гъуэгу сытекӀакъым бзаджагъэкӀэ.

²³ Сыту жыпӀэмэ Абы и хьэкумхэр псори си пащхьэщ, хабзэу Абы игъэувахэм пэӀэщӀэ зысщӀакъым.

²⁴ Абы и дежкӀэ мыхъун лъэпкъ сщӀакъым, мысагъэм сыхэмыхуэн щхьэкӀэ, сысакъащ.

²⁵ Абы щыпкъагъэу хузиӀэм, си Ӏэхэм я къабзагъэм пэкӀуэу Зиусхьэным фӀы къысхуищӀащ.

²⁶ Къыпхуэпэжым пэжыгъэ пхэлъу удызокӀуэ, мыхъун гуэри зыбгъэдэмылъым Уэри уигу хуилъкъым мыхъун.

²⁷ Къабзэм – къабзэу, хьилэм хуэфащэ хьилагъэ иботыж Уэ.

²⁸ Сыту жыпӀэмэ хэутэн ящӀа лъэпкъыр Уэ хыбошыж, ауэ зыкъызыфӀэщӀыжхэр уогъэцӀыкӀу.

²⁹ Си гъуэгу уэздыгъэр щӀыбогъанэ Уэ; сызыхэт кӀыфӀыгъэр Абы къегъэнэху – Зиусхьэну си Тхьэм.

³⁰ Узигъусэмэ, дзэ пакӀэм сытекӀуэнщ сэ, си Тхьэр си гъусэу къалэ блыным сыщхьэдэхынщ.

³¹ ЩыщӀагъэншэщ си Тхьэм и гъуэгур, Зиусхьэным и псалъэм шэч хэлъкъым; щхьэегъэзыпӀэкӀэ хуэкӀуэ псоми Ар я мэӀущ.

³² Сыту жыпӀэмэ Зиусхьэным нэмыщӀ, хэт Тхьэр, дыкъэзыхъумэ абрэмывэр хэт, ди Тхьэм нэмыщӀ?

³³ Тхьэращ гуащӀэ къызэзытыр, си гъуэгур щыщӀагъэншэ схуэзыщӀыр.

³⁴ Щыхь лъакъуэхэм хуэдэу, егъэжан си лъэр, лъагапӀэм сытрегъэт шынагъуэ хэмылъу.

³⁵ Си Ӏэхэр зэуэным хуегъасэ – абыхэм жэз шабзэр яукъуэдиину.

³⁶ Сыкъызэребгъэлын мэӀур Уэ къызэптащ, уи Ӏэ ижьыр къысщӀоӀэ, укъысхуэгумащӀэурэ сыбогъэлъэщ.

³⁷ Си лъэбакъуэхэм щӀыпӀэ Ӏэхуитлъэхуит яхубощӀри, си лъакъуэхэр щӀэщӀэркъым.

³⁸ Си бийхэм салъожьэ, сащӀохьэ, хэзмыгъащӀэуи къэзгъэзэжыркъым.

³⁹ Сэ абыхэм лъэмбытӀ езгъэкӀуркъым, къэтэджыжыни ялъэкӀыркъым; мэджалэри, си пащхьэ къохуэ.

⁴⁰ Сыту жыпӀэмэ абыхэм сезэуэн слъыбогъэкӀ Уэ, къыспэувахэр си пащхьэ щохуэх.

⁴¹ Си бийхэм я щӀыб къысхубогъэгъазэри, сызыхуэмылъагъухэр сэ согъэкӀуэд;

⁴² дэӀэпыкъуэгъу хуейуэ мэгуо, ауэ щыӀэкъым къезыгъэлын, итӀани Зиусхьэным зыхуагъазэ, ауэ Ар дэӀэпыкъуэгъу яхуэхъуркъым.

⁴³ Жьым сабэр зэрипхъэнкӀым хуэдэу, сэ ахэр изокъухь, уэрам фӀейм хуэдэу соутэ.

⁴⁴ ЦӀыху лъэпкъыу зыкъыспэзыӀэтам сащыпхъумащ, хамэ лъэпкъхэм пашэ сахуэпщӀащ. СымыцӀыхуу щыта цӀыху лъэпкъхэр къысхуэӀурыщӀэ хъуащ.

⁴⁵ Си макъ зэхаха къудеймэ, жысӀэр ягъэзащӀэ, си пащхьэ къыщоубзэ хамэхэр.

⁴⁶ Гъуэлагъэхэу хамэ лъэпкъхэр мэкӀэзыз зэрыс гъэпщкӀупӀэхэм къокӀ.

⁴⁷ Зиусхьэныр псэущ, сыкъэзыхъумэ абрэмывэм щӀыхь хуэфщӀ. Тхьэуэ сыкъезыгъэлар урелъагэ, Тхьэм и щӀыхьыр лъагэу фӀэт.

⁴⁸ Тхьэм сэр папщӀэ егъэпшынэ, Абы цӀыху лъэпкъхэр си Ӏэ кърелъхьэ.

⁴⁹ Уэ, Тхьэуэ си бийхэм сакъыӀэщӀэзыхыжам, къыстебанэхэм ящхьэ сыбощӀ; цӀыху залымым сыкъыӀэщӀыбохыж.

⁵⁰ НэгъуэщӀ лъэпкъхэм я пащхьэм Уи щӀыхь щысӀуэтэнщ абы папщӀэ, Зиусхьэн, уи цӀэм щӀыхь уэрэд хужысӀэнщ.

⁵¹ Тхьэм Езым и пащтыхьым къыдрегъэх текӀуэныгъэшхуэхэр, Езым къыхиха Даути абы къытехъукӀыжахэми мыкӀуэдыжын лъагъуныгъэ къахуегъэфащэ игъащӀэкӀэ.