Уэрэд 16 - ХъыбарыфӀыр. ЩӀэдзапӀэр. Уэрэд ЛъапӀэхэр

16-нэ Уэрэд ЦӀыху хейм и тхьэлъэӀу

Даут и тхьэлъэӀу

¹ Захуагъэ сызэрытетым папщӀэ си лъэӀу зэхэх, Зиусхьэн, уи нэӀэ къытегъэт си джэ макъ, хьилагъэ зыхэмылъ ӀупщӀэм я лъэӀум уи тхьэкӀумэ къыхуэгъазэ.

² Си хеягъэ къэгъэлъагъуэ, Уи нэхэми щыпкъагъэр ирелъагъу.

³ Уэ си гур бгъэунэхуащ, жэщу укъэкӀуащ си деж, укъызэплъэкӀуащ, ауэ мыхъун къысхэбгъуэтакъым сэ; Ӏеягъэ гуэри жысӀэркъым.

⁴ ЦӀыхухэм сыт хуэдэ бзаджагъэ ящӀами, уи жьэ къыжьэдэкӀ псалъэхэм сытемыкӀыу, залымыгъэ зезыхьэхэм я гъуэгум пэӀэщӀэ зысщӀащ.

⁵ Си лъэр уи гъуэгум тетщ, сылъэпэрэпакъым.

⁶ Уэ зыпхузогъазэ сэ, сыту жыпӀэмэ Уэ жэуап къызэптынущи, си Тхьэ; уи тхьэкӀумэхэр сэ къысхуэгъази, си псалъэр Уэ къызэхэх.

⁷ Уи лъагъуныгъэ мыкӀуэдыжу Уэ пхэлъри къыслъыгъэс – къапэувыжхэм ящыпхъумэну уи Ӏэ ижьым деж щхьэегъэзыпӀэ лъыхъуэхэм я КъегъэлакӀуэщ.

⁸ Нэкум хуэдэу сыкъэхъумэ, уи дамэхэм я жьауэ щӀагъ сыщӀ.

⁹ БзаджащӀэхэу сэ къыстебанэхэм самылъагъуну, саукӀын зыфӀэигъуэ си бийхэу сыкъэзыувыхьхэм сащыхъумэ.

¹⁰ Абыхэм ягухэр гущӀэгъу щӀыным хузэхуэщӀащ, жьэхъуу мэпсалъэ ахэр.

¹¹ Лъэбакъуэ счыху къэси сыкъаувыхь; я нэхэр къыстрагъэдиящ, щӀыгум сытрадзэну;

¹² къопхъуэным хуэхьэзыр аслъэным ещхьщ, тӀасхъапӀэ щӀыпӀэм щыс аслъэн шырым.

¹³ СыкъэӀэт, Зиусхьэн, япэув абыхэм, я лъэр щӀэуд. Уи джатэмкӀэ саӀэщӀэхыж бзаджащӀэхэм,

¹⁴ уи ӀэкӀэ, Зиусхьэн, цӀыхухэм, мы дунейм афӀэкӀ псэукӀэ щызимыӀэхэм; абыхэм я адэ-анэхэми я ныбэхэр узыным нэсу, я сабийхэми къэжьыным нэсу, зрырегъэнщӀ; я лӀэужьхэми къелыжар къахуренэ.

¹⁵ Сэ уи нэгу сыщӀэплъэнщ щыпкъагъэ сиӀэу; сыкъэушыжмэ, узэрыслъагъумкӀэ сигу зэгъэнущ.