Уэрэд 15 - ХъыбарыфӀыр. ЩӀэдзапӀэр. Уэрэд ЛъапӀэхэр

15-нэ Уэрэд Тхьэм щыгугъым и тхьэлъэӀу

Даут и уэрэд

¹ Сыхъумэ, си Тхьэ, щхьэегъэзыпӀэ сщӀар Уэращ.

² Зиусхьэным жызоӀэ сэ: «Уэращ си Зиусхьэныр; фӀыуэ сиӀэр къызыбгъэдэкӀыр* Уэращ».

³ ЩӀыгум тет Тхьэм и фӀэлӀыкӀ зыгу илъхэращ щӀыхь зыпылъыр, сызыщыгуфӀыкӀыр.

⁴ НэгъуэщӀ тхьэхэм хуэлажьэхэм гукъеуэ куэд къызыхуахьыж, лъыр зыхэт я къурмэн ядэсщӀынкъым, я тхьэхэм селъэӀункъым, я цӀэхэм я гугъу къэсщӀынкъым.

⁵ Зиусхьэн, Уэращ ӀыхьэфӀу сиӀэр, си насыпыр зи Ӏэ илъыр Уэращ.

⁶ Къысхуэбгъэфэща гъуэгухэр гуапэщ, Ӏыхьэу къыслъысамкӀэ сарэзыщ.

⁷ ЩӀыхь хуэсщӀынщ сызыгъэгъуазэ Зиусхьэным; жэщми си гум сеущий.

⁸ Зиусхьэныр сигу изгъэхуркъым игъащӀэкӀэ; Ар си ижьырабгъущи, сылъэпэрэпэнкъым.

⁹ Аращ сэ сыщӀэгуфӀэр, аращ гуфӀэгъуэм сыщӀыхэтыр; шынагъуэ симыӀэуи сопсэу.

¹⁰ Сыту жыпӀэмэ хьэдрыхэ сыкъибнэнукъым, сэ пэжыгъэкӀэ сыпхуэӀурыщӀащи, лӀахэм я дунейм себгъэкӀуэлӀэнкъым.

¹¹ ГъащӀэм екӀу гъуэгур сыбогъэлъагъу; уи деж щыӀэр гуфӀэгъуэ защӀэщ, Уи Ӏэ ижьырщ тхъэгъуэр игъащӀэм къэзытыр.