Уэрэд 148 - ХъыбарыфӀыр. ЩӀэдзапӀэр. Уэрэд ЛъапӀэхэр

148-нэ Уэрэд Тхьэм къигъэщӀа псоми щӀыхь хурещӀ Абы!

Зиусхьэным щӀыхь хуэфщӀ

¹ Уафэхэм щыӀэхэ, щӀыхь хуэфщӀ Зиусхьэным, лъагапӀэхэм щыпсэухэ, Зиусхьэным щӀыхь хуэфщӀ.

² Зиусхьэным и мелыӀыч псоми щӀыхь хуэфщӀ Абы. Зиусхьэным и уафэдзэ псоми щӀыхь хуэфщӀ Абы.

³ Дыгъэми мазэми щӀыхь хуэфщӀ Абы, лыдырэ вагъуэ псоми щӀыхь хуэфщӀ Абы.

⁴ Я нэхъ уафэ лъагэхэми щӀыхь хуэфщӀ Абы, псыхэу уафэм я нэхъ лъагэхэми.

⁵ ЩӀыхь хурещӀ Зиусхьэным и цӀэм; Абы унафэ ищӀри, ахэр къигъэщӀащ;

⁶ игъащӀэкӀэ игъэуващ ахэр, мыкъутэжын унафэр къаритащ.

⁷ ЩӀыгум тетхэм щӀыхь хуэфщӀ Зиусхьэным, бдзэжьеишхуэхэм, кууупӀэ псоми,

⁸ мафӀэу, уэфу, уэсу, пшагъуэу, жьыбгъэшхуэу, Абы и унафэ зыгъэзащӀэхэм, щӀыхь хуэфщӀ!

⁹ Къущхьэу щыӀэхэм, Ӏуащхьэ псоми, пхъэщхьэмыщхьэ жыгхэм, мэз псоми!

¹⁰ ХьэкӀэкхъуэкӀэхэм, былым псоми, хьэпщхупщхэм, къэзылъэтыхь псоми!

¹¹ ЩӀыгу пащтыхьхэм, цӀыху лъэпкъ псоми, пщыхэм, щӀылъэм тепщэныгъэ щызиӀэхэм!

¹² ЩӀалэ ныбжьыщӀэхэм, пщащэ цӀыкӀухэм, лӀыжьхэм, щауэ щӀалэхэм!

¹³ Зиусхьэным и цӀэм щӀыхь хурещӀ; сыту жыпӀэмэ Абы и цӀэр псом нэхърэ нэхъ лъагэу Ӏэтащ. Абы щӀыхьу иӀэр щӀылъэми уафэми щыӀэ псоми я нэхъ инщ.

¹⁴ И лъэпкъым гуащӀэ хилъхьащ Абы, и лъэпкъым щӀыхь хуищӀын папщӀэ, израил лъэпкъыу Езым игу пэблагъэм Зиусхьэным щӀыхь хуэфщӀ!