Уэрэд 146 - ХъыбарыфӀыр. ЩӀэдзапӀэр. Уэрэд ЛъапӀэхэр

146-нэ Уэрэд ЛъэкӀыныгъэ псори зиӀэ Тхьэм деж щӀыхьыр

¹ Зиусхьэным щӀыхь хуэфщӀ, фӀыщ ди Тхьэм уэрэд хужытӀэныр, сыту жыпӀэмэ ар гуапэщ – Абы хуэфащэ щӀыхьыр тӀуэтэныр.

² Зиусхьэным Ерусалим егъэувыж, еугъуеиж Израил ирахуахэр.

³ Зигу кӀуэдахэр Абы егъэхъуж, абыхэм я гухэщӀ-гукъеуэхэм йоӀэзэ.

⁴ Вагъуэхэм я бжыгъэр къигъэнэхуащ; цӀэ яфӀищащ абыхэм.

⁵ Ди Зиусхьэныр ин дыдэщ, ин дыдэщ Абы и гуащӀэри, Абы и акъылри гъунэншэщ.

⁶ ЛъэгущӀэт ящӀа цӀыхухэр лъагэу еӀэт Зиусхьэным, цӀыху бзаджэхэр щӀым хегуэ.

⁷ Зиусхьэным щӀыхь уэрэдыр хужыфӀэ; пшынэ дыкъуакъуэкӀэ фыдежьу ди Тхьэм.

⁸ Уафэм пшэ къытрегъэхьэ Абы, уэшхыр щӀым щхьэкӀэ къегъэхьэзыр, Ӏуащхьэхэм удз къыщегъэкӀ;

⁹ Былымхэм удз ярет, къуалэжьым и шырхэри егъашхэ.

¹⁰ Шым и къарукъым Абы игу ирихьыр; зэрыарэзыр цӀыхум и лъэм и псынщӀагъыркъым;

¹¹ Зиусхьэным игу ирихьыр Абы фӀэлӀыкӀ хузиӀэхэу и лъагъуныгъэ мыкӀуэдыжым щыгугъхэращ.