Уэрэд 145 - ХъыбарыфӀыр. ЩӀэдзапӀэр. Уэрэд ЛъапӀэхэр

145-нэ Уэрэд Тхьэр захуэщ

¹ Зиусхьэным щӀыхь хуэфщӀ. Зиусхьэным, сигу, щӀыхь хуэщӀ.

² Сыпсэуху, щӀыхь хуэсщӀынщ Зиусхьэным; сэ сыпсэуху, Зиусхьэным щӀыхь уэрэд хужысӀэнщ.

³ Тепщэныгъэ зиӀэхэм фащымыгугъ, цӀыхум и къуэхэу дэӀэпыкъуэгъу хъун зылъэмыкӀынухэм.

⁴ И псэр хокӀри, абы и щӀыгу егъэзэж; и гухэлъхэр мэкӀуэдыж а махуэм.

⁵ НасыпыфӀэщ Екъуб и Тхьэр зи дэӀэпыкъуэгъур, Зиусхьэну и Тхьэм щыгугъыр,

⁶ уафэр, щӀылъэр, хыр – а псоми щыӀэр къэзыгъэщӀауэ, щыпкъэныгъэр игъащӀэкӀэ зыхэлъыр,

⁷ яужьыгуахэм я хьэкъ езыгъэгъуэту, мэжэщӀалӀэхэм щӀакхъуэ езытыр. Хьэпсым исхэр щхьэхуит ещӀыж Зиусхьэным;

⁸ нэфхэр къегъэплъэж Зиусхьэным, къиным иухуахэр зыпкъ ирегъэувэж Зиусхьэным; къыхуэщыпкъэхэр фӀыуэ елъагъу Абы.

⁹ Яхуосакъ хэхэсхэм Зиусхьэныр, фызабэм, зеиншэм доӀэпыкъу; ауэ цӀыху бзаджэхэм я гъуэгу кӀуэдыпӀэм хуегъазэ.

¹⁰ Уэ, Цион къалэ, Зиусхьэным, уи Тхьэм, иӀыгъынщ тепщэныгъэр игъащӀэкӀэ – щӀэблэм щӀэблэр кӀэлъыкӀуэу. ЩӀыхьыр ейщ Зиусхьэным!