Уэрэд 144 - ХъыбарыфӀыр. ЩӀэдзапӀэр. Уэрэд ЛъапӀэхэр

144-нэ Уэрэд ЩӀыхь Уэрэд

Даут и щӀыхь уэрэд

¹ Сэ уи щӀыхь сӀуэтэнщ, си Тхьэу си пащтыхь, лӀэщӀыгъуэм лӀэщыгъуэр кӀэлъыкӀуэу, уи цӀэм щӀыхь хуэсщӀынщ.

² Сыт хуэдэ махуи щӀыхь пхуэсщӀынщ, лӀэщӀыгъуэм лӀэщӀыгъуэр кӀэлъыкӀуэу, уи цӀэм щӀыхь хуэсщӀынщ.

³ Ин дыдэщ Зиусхьэныр, щӀыхьышхуэри хуэфащэщ; Абы и инагъыр зыхуэдизыр къызыфӀэбгъэщӀын плъэкӀынукъым.

⁴ Зы щӀэблэм адрей щӀэблэм хуиӀуэтэжынщ Уэ уи ӀэщӀагъэхэм я щӀыхьыр; уи Ӏуэхушхуэ гъэщӀэгъуэнхэм я хъыбар зэлъащӀысынщ.

⁵ Сэ уи инагъым и щӀыхь лъагэмрэ уи Ӏуэху щӀагъуэхэмрэ сегупсысынщ.

⁶ Ӏуэху шынагъуэу Уэ зэфӀэпхахэм я лъэкӀыныгъэшхуэм и хъыбар яӀуэтэнщ цӀыхухэм, сэри Уэ уи инагъым и хъыбар зэлъезгъэщӀысынщ.

⁷ Уэ зыхуэдэ щымыӀэу пхэлъ фӀыгъэшхуэр цӀыхухэм ягъэӀунщ, Уэ щыпкъагъэу пхэлъри уэрэду жаӀэнщ.

⁸ Хьэлэлщ, гущӀэгъущӀщ Зиусхьэныр, щӀэх мыгубжьу, лъагъуныгъэ мыкӀуэдыж хэлъщ Абы.

⁹ Псоми яхуэфӀщ Зиусхьэныр, Абы къигъэщӀа псоми яхуещӀ гущӀэгъу.

¹⁰ КъэбгъэщӀауэ псэ зыӀут псоми щӀыхь къыпхуащӀынщ, Зиусхьэн, уи цӀыху лъапӀэхэм я жьэм уи щӀыхь жьэдэлъынщ.

¹¹ Уи тепщэныгъэшхуэм и щӀыхьым и хъыбар яӀуэтэнщ, лъэкӀыныгъэ ину пхэлъыр яӀуэтэнщ,

¹² лъэкӀыныгъэ ин зыхэлъ уи ӀэщӀагъэхэри щӀыхь зыпылъу, уи тепщэныгъэшхуэр зэрыинри цӀыхум и къуэхэм ящӀэн папщӀэ.

¹³ Уэ уи тепщэныгъэшхуэр мыкӀуэдыжын тепщэныгъэшхуэщ. Уэ тепщэныгъэшхуэм лӀэужь псори зэлъищӀысынщ. Зиусхьэныр и псалъэ псоми хуэщыпкъэщ, и ӀуэхущӀагъэ псоми фӀыгъэшхуэ хэлъщ.

¹⁴ ЕщӀа псоми Зиусхьэным защӀегъакӀуэ, гугъуехьым иухуа псори Абы зыпкъ ирегъэувэж.

¹⁵ Къыпщыгугъыу къоплъ псори шхын ябот абыхэм игъуэм.

¹⁶ Уи Ӏэр къызэӀыбохри, псэ зыпыт псоми зыхуэныкъуэр ябогъэгъуэт.

¹⁷ Зиусхьэныр, захуагъэ хэлъу, и гъуэгу псоми тетщ, Абы и Ӏуэху псоми фӀыгъуэ яхэлъщ.

¹⁸ Зыхуэзыгъазэхэм, щыпкъагъэ хуизыӀэхэм, гупцӀанагъэкӀэ къеджэхэм псоми япэблагъэщ Зиусхьэныр.

¹⁹ ФӀэлӀыкӀ хуизыӀэхэм зыхуэныкъуэр яхуещӀэ, я гухэщӀ макъ зэхех, кърегъэл ахэр.

²⁰ Зиусхьэныр фӀыуэ зылъагъу псори къехъумэ Абы, цӀыху бзаджэ псори лъапсэкӀуэд ищӀынущ Абы.

²¹ Си жьэм жиӀэнщ Зиусхьэным и щӀыхь, сыт пкъынэ-лыни игъащӀэкӀэ щӀыхь хурещӀ Абы и цӀэ лъапӀэм.