Уэрэд 143 - ХъыбарыфӀыр. ЩӀэдзапӀэр. Уэрэд ЛъапӀэхэр

143-нэ Уэрэд Пащтыхьым и тхьэлъэӀу

¹ Сыкъэзыхъумэ абрэмывэу Зиусхьэным щӀыхь хузощӀ, си Ӏэхэр – зауэм, си Ӏэпхъуамбэхэр – бэнэныгъэм хуэзыгъасэм;

² Езыращ лъагъуныгъэ мыкӀуэдыж къысхуэзыщӀыр, быдапӀэу икӀи хъумапӀэу сиӀэр, сыхэзышыжыр, мэӀу къысхуэхъур, щхьэегъэзыпӀэу сиӀэр; цӀыху лъэпкъхэр схуэӀурыщӀэну Абы си Ӏэ кърелъхьэ.

³ Зиусхьэн! Сыт лӀэужьыгъуэ цӀыхур – Уэ уи нэӀэ абы тебгъэтыну, цӀыхум и къуэри – Уэ абы уегупсысыну?

⁴ ЦӀыхур жьы мащӀэм ещхьщ, абы и махуэхэр ныбжь кӀуэдыжым хуэдэщ.

⁵ Зиусхьэн! Уи уафэхэр къэӀуби, къех! ЯтеӀэби къущхьэхэм, ахэр зэщӀищтэнщ Ӏугъуэм;

⁶ уафэхъуэпскӀыр къэгъэлыди, уи бийхэр зэбгрыху; уи шабзэшэхэр утӀыпщи, ахэр зэбгрыху.

⁷ Уи Ӏэр лъагапӀэм къешиехи, сыкъегъэл, псыбэм сыхэшыжи; хамэ цӀыхухэм саӀэщӀэхыж,

⁸ мыхъумыщӀэхэр зи жьэм къыжьэдэкӀхэу, тхьэлъанэ ящӀми, пцӀы зыупсхэм.

⁹ Ди Тхьэ, пхужысӀэнщ уэрэдыщӀэ, бзэпсипщ зэрылъ пшынэ дыкъуакъуэмкӀэ сэ уэрэд пхужезгъэӀэнщ.

¹⁰ Уэ, пащтыхьхэм текӀуэныгъэр езытым, уи ӀурыщӀэ Даут къезыгъэлам;

¹¹ джатэ залымым сыщыхъуми, хамэ цӀыхухэм саӀэпыхыж, мыхъумыщӀэхэр зи жьэм къыжьэдэкӀхэу, тхьэлъанэ ящӀми, пцӀы зыупсхэм.

¹² КъэкӀыгъэхэр я хэхъуэгъуэ пӀалъэм зэрызэхэкӀыжым хуэдэу ди къуэхэр ирехъу, ди пхъухэр – пщы сэрейхэм щӀэт пкъо ишахэм хуэдэ.

¹³ Гъавэр ярыз ди гуэнхэр ирехъу, гъэнщӀауэ; ди мэлхэр щэрэ мину иребагъуэ; ди хъупӀэхэм минипщӀхэу иребэгъухь.

¹⁴ Дивхэр земыкӀуэжыфу пшэр ирехъу; ди уэрамхэм хъунщӀи, дыгъуи, гухэщӀ макъи дремыт.

¹⁵ НасыпыфӀэщ зи Ӏуэхур абы тет лъэпкъыр. НасыпыфӀэщ цӀыху лъэпкъыу Зиусхьэныр Тхьэуэ зиӀэр.