Уэрэд 134 - ХъыбарыфӀыр. ЩӀэдзапӀэр. Уэрэд ЛъапӀэхэр

134-нэ Уэрэд ЩӀыхь уэрэд

Зиусхьэным щӀыхь хуэфщӀ

¹ Зиусхьэным и цӀэм щӀыхь хуэфщӀ, щӀыхь хуэфщӀ Зиусхьэным и ӀурыщӀэу,

² Зиусхьэным и унэ ӀуэхущӀэхэм, ди Тхьэм и унэшхуэм и пщӀантӀэм дэтхэм.

³ Зиусхьэным щӀыхь хуэфщӀ, Зиусхьэныр – фӀыщ; уэрэд хужыфӀэ и цӀэм; сыту жыпӀэмэ ар тхъэгъуэ дыдэщ.

⁴ Сыту жыпӀэмэ Екъуб зыхухихащ Зиусхьэным, Езы еину къыхихащ Израил лъэпкъыр.

⁵ Сэ сощӀэ Зиусхьэныр зэрыин дыдэр, ди Зиусхьэныр тхьэ псоми нэхърэ зэрынэхъ лъагэр.

⁶ Уафэми, щӀылъэми, хыхэми, хыхэм я кууупӀэхэми Зиусхьэным щегъэпс зыхуей псори;

⁷ щӀым и гъунэм къыщыдрешей уафапшэхэр, уэшх къешх щыхъукӀэ, уафэр къегъэхъуэпскӀ, Езым и хэщӀапӀэм жьыбгъэр къреш.

⁸ Абы игъэкӀуэдащ Мысырым и щыпэлъхухэр – цӀыхум къыщыщӀидзэу былымхэм нэсу.

⁹ Абы и нэщэнэхэр, и телъыджэхэр Мысырым щаригъэлъэгъуащ, фирхьэунми абы и цӀыхухэми.

¹⁰ ЦӀыху лъэпкъыбэхэр игъэкӀуэдащ, иукӀащ пащтыхь лъэщхэри:

¹¹ эмор пащтыхьу Сихон, башан пащтыхьу Ог, ханаанхэм я пащтыхь псори;

¹² я щӀыгури Ӏыхьэу итащ, Ӏыхьэ хуэхъуну Израил и цӀыху лъэпкъым.

¹³ Зиусхьэн! ИгъащӀэкӀэ щыӀэнщ уи цӀэр, щӀэблэ зэкӀэлъыкӀуэхэм ягу уилъынщ.

¹⁴ Сыту жыпӀэмэ Зиусхьэным и цӀыху лъэпкъым и хьэкум Ӏуэхум хейуэ хигъэкӀынщ, и ӀурыщӀэхэм гущӀэгъу хуищӀынщ.

¹⁵ Хамэ лъэпкъхэм я тхьэ нэпцӀхэр – дыжьынщ, дыщэщ – цӀыху ӀэщӀагъэщ ахэр.

¹⁶ Ӏупэ яӀэщ, ауэ псэлъэфхэркъым; нэ яӀэщ, ауэ зыри ялъагъуркъым;

¹⁷ тхьэкӀумэ яӀэщ, ауэ зэхахыркъым, я жьэхэм жьы къашэркъым.

¹⁸ Абыхэм хуэдэ ирехъу ахэр зыщӀхэр, абыхэм ящыгугъхэр.

¹⁹ Израилым и лъэпкъым щӀыхь хуэфщӀ Зиусхьэным! Хьэрунхэм я дин пашэхэм Зиусхьэным щӀыхь хуэфщӀ.

²⁰ Лэуихэм я унэ! Зиусхьэным щӀыхь хуэфщӀ. Зиусхьэным фӀэлӀыкӀ хузиӀэхэм Зиусхьэным щӀыхь хуэфщӀ.

²¹ Ерусалим зи псэупӀэ Зиусхьэным Цион къалэм фыдэту щӀыхьышхуэ хуэфщӀ. Зиусхьэным щӀыхь хуэфщӀ.