Уэрэд 13 - ХъыбарыфӀыр. ЩӀэдзапӀэр. Уэрэд ЛъапӀэхэр

13-нэ Уэрэд ЦӀыхухэм я бзаджагъэм хуагъэхь

УэрэдыӀуэхэмрэ пшынауэхэмрэ я пашэм папщӀэ. Даут и уэрэд

¹ Акъылыншэм игукӀэ жеӀэ: «ЩыӀэкъым Тхьэ». Абыхэм напэншагъэхэр зэрахьэ, ахэр щыкӀащ, фӀы зылэжь яхэткъым.

² Зиусхьэныр уафэгум къоплъыхри, дуней цӀыхухэм къахоплъэ, акъыл зиӀэрэ Езым лъыхъурэ яхэтмэ, зригъэлъагъуну.

³ Тхьэм и гъуэгум текӀащ псори, щхьэрыуэри гъуэщащ; фӀы зыщӀэ яхэткъым – зы нэрыбги яхэткъым.

⁴ Ер зезыхьэ псоми зэхэщӀыкӀ ямыӀэу аращ – щӀакхъуэ зэрашхым хуэдэу, си цӀыху лъэпкъыр зышххэм, Тхьэм емылъэӀухэм.

⁵ Шынагъуэшхуэм зэлъиубыдынщ ахэр, сыту жыпӀэмэ Тхьэр къыхуэпэжхэм ящӀыгъущ.

⁶ ЦӀыху тхьэмыщкӀэм гухэлъу иӀэр вгъэкӀуэдыну жыфӀащ, ауэ Зиусхьэныращ абы и щхьэегъэзыпӀэр.

⁷ Цион Ӏуащхьэ къикӀыу, хэт израил лъэпкъым къыхуэкӀуэнур бийхэм къаӀэщӀихыжыну? Зиусхьэным и лъэпкъыр гъэрыпӀэм къыщришыжкӀэ, Екъуб къытехъукӀахэр гуфӀэгъуэшхуэм зэлъищтэнщ, Израил и щылъхухэм къахуэкӀуэнщ гурыфӀыгъуэшхуэ.