Уэрэд 113 - ХъыбарыфӀыр. ЩӀэдзапӀэр. Уэрэд ЛъапӀэхэр

113-нэ Уэрэд ӀутӀыж уэрэд

¹ Израил цӀыхухэр Мысырым къыщикӀыжым, Екъуб къытепщӀыкӀахэр хамэбзэкӀэ псалъэ цӀыху лъэпкъыр къыщабгынэм,

² Иудэ – Зиусхьэным и лъэпкъ лъапӀэу, Израилыр – Абы и унейуэ хъуащ.

³ Къилъагъури хыр, ежэжьащ; Иордан псыри зэщӀэкӀуэжащ.

⁴ Къущхьэхэр, мэлым хуэдэу, ежажьэри, зэхэзежэ хъуащ, Ӏуащхьэхэр, щынэхэм хуэдэу, дэпкӀей – дэлъейуэ зэрехьэжьащ.

⁵ Сыт, хы, къыпщыщӀар, Сыт ущӀежэжьар? Сыт, Иордан, къыпщыщӀар, узэщӀэмыкӀуэу мыхъуну?

⁶ Сыт фэ, къущхьэхэр, мэлым хуэдэу, сыт Ӏуащхьэхэр, щынэм хуэдэу, фыщӀыдэпкӀей – дэлъейр?

⁷ Зиусхьэным и пащхьэ щыкӀэзыз, щӀыгу, Екъуб и Тхьэм и пащхьэ щыкӀэзыз,

⁸ абрэмывэр – гуэл, мывэр псы къэкӀуапӀэ зыщӀам и пащхьэ.

⁹ Дэракъым, Зиусхьэн, дэракъым щӀыхь зыхуэфащэр, щӀыхьыр уи цӀэм хуагъэфэщащ, уи лъагъуныгъэ мыкӀуэдыжымрэ уи щыпкъагъэмрэ папщӀэ.

¹⁰ Хамэ лъэпкъхэм сыт щхьэкӀэ жаӀэн: «Дэнэ щыӀэ абыхэм я Тхьэр?»

¹¹ Дэ ди Тхьэр уафэгум итщ; зыхуей псори ещӀэ.

¹² Езыхэм я тхьэхэр – цӀыху ӀэщӀагъэщ, дыжынымрэ дыщэмрэ къыхэщӀыкӀауэ.

¹³ Абыхэм жьэ яӀэщ, ауэ псалъэркъым, абыхэм нэ яӀэщ, ауэ ялъагъуркъым;

¹⁴ тхьэкӀумэ яӀэщ, ауэ абыхэм зэхахыркъым; пэ яӀэщ, ауэ мэ къащӀихьэркъым;

¹⁵ Ӏэ япытщ, ауэ здынэсыр ящӀэркъым; яӀэщ лъакъуэ, ауэ ахэр зекӀуэркъым; абыхэм я джийм макъ кърагъэкӀын ялъэкӀыркъым.

¹⁶ Ахэр зыщӀри, абыхэм ящыгугъри, я тхьэхэм хуэдэ ирехъу.

¹⁷ Израил лъэпкъ! Зиусхьэным щыгугъ! Ар фи дэӀэпыкъуэгъущ, фи мэӀущ.

¹⁸ Хьэрун дин пашэхэ! Зиусхьэным фыщыгугъ! Ар фи дэӀэпыкъуэгъущ, фи мэӀущ!

¹⁹ Зиусхьэным фӀэлӀыкӀ хузиӀэхэр, фыщыгугъ Зиусхьэным! Ар фи дэӀэпыкъуэгъущ, фи мэӀущ.

²⁰ Зиусхьэным игу дилъщ, Абы и нэфӀ къытщыхуэнщ, Израили Хьэрун дин пашэхэми къащыхуэнщ Абы и нэфӀ;

²¹ Зиусхьэным фӀэлӀыкӀ хузиӀэм, цӀыкӀуи ини, къащыхуэнщ и нэфӀ.

²² Зиусхьэным нэхъыбэ, нэхъыбэ къыфхрегъахъуэ – фи сабийхэми фэри.

²³ Уафэгуи щӀыгуи къэзыгъэщӀа Зиусхьэным и нэфӀ къыфщрехуэ.

²⁴ Уафэгур Зиусхьэным ейщ, щӀыгур къаритащ цӀыхум.

²⁵ ЛӀахэракъым Зиусхьэным щӀыхь хуэзыщӀыр, хэгъэгу макъыншэм еххэракъым.

²⁶ Ауэ хуэтщӀынщ Зиусхьэным щӀыхь – иджы щегъэжьауэ игъащӀэкӀэ Зиусхьэным щӀыхь хуэфщӀ.