Уэрэд 108 - ХъыбарыфӀыр. ЩӀэдзапӀэр. Уэрэд ЛъапӀэхэр

108-нэ Уэрэд ТхьэмыщкӀагъуэм хэт цӀыхум Тхьэм зыхуегъазэ

УэрэдыӀуэхэм я пашэм папщӀэ. Даут и уэрэд

¹ ЩӀыхьу сщӀым и Тхьэ, зумыущэху!

² Сыту жыпӀэмэ цӀыху бзаджэхэм, хьилэшыхэм я жьэм сыжьэдэлъщ, псалъэ нэпцӀкӀэ ящӀ си гугъу.

³ Лажьэ симыӀэу, си хъуреягъкӀэ сыкъаувыхь жагъуэгъу псалъэкӀэ, сыхьэкъыншэу сагъэбий.

⁴ Сэ Тхьэм сахуелъэӀу пэтрэ, си лъагъуныгъэм папщӀэ сагъэкъуаншэ абыхэм.

⁵ Си фӀыщӀагъэм бзаджагъэкӀэ къыпогъуэкӀ, си лъагъуныгъэм – лъагъумыхъуныгъэкӀэ.

⁶ ХьэкумыщӀэ бзаджэр хуэгъэув си бийр игъэкъуэншэну, езым и уэчыл игъэкъуэншэну ирехъу.

⁷ Хьэкум щӀыгъуэм ар къуаншэ ирехъу, и тхьэлъэӀуи гуэныхь хурырехъу;

⁸ и махуэхэр кӀэщӀ ирехъу, и мылъкури нэгъуэщӀым лърес,

⁹ и сабийхэр ибэ ирехъу, и щхьэгъусэри фызабэу къренэ;

¹⁰ кърекӀухь и сабийхэм лъэӀуакӀуэу, я унэ зэхэкъутам щӀреху;

¹¹ щӀыхуэ къезытым езы и мылъку псори фӀретхьэкъу, и ӀуэхущӀагъэ псори хамэ Ӏыхьэ ирехъу;

¹² гущӀэгъу хуэзыщӀын къремыхъу, и сабий зеиншэхэм – къахуэгумэщӀыну.

¹³ ЛъапсэкӀуэд ирехъу абы къытепщӀыкӀахэр, къэкӀуэну щӀэблэхэм ящрегъупщэж абы и цӀэр.

¹⁴ Абы и адэжьхэм я мыхъумыщӀагъэр Зиусхьэным игу кърекӀыж, абы и анэм гуэныхьу ищӀар игъащӀэкӀэ иремыкӀуэдыж;

¹⁵ я гуэныхьхэр дапщэщи ирет Зиусхьэным и пащхьэм, езыхэри цӀыхум ягу къыщремыкӀыж мы щӀыгум.

¹⁶ ТхьэмыщкӀэу, щыщӀагъэ зиӀэм, зигу кӀуэдам фӀы яхуищӀэнкӀэ хуэмейуэ, лӀэжыху кърихуэкӀащ.

¹⁷ Гыбзэр фӀыуэ илъэгъуащи, ар абы къытрехуэж; Тхьэм и нэфӀ къащыхуэну хуеякъыми, Тхьэм и нэфӀым пэжыжьэ ирехъу.

¹⁸ Гыбзэ фащэ зыхуищӀыжащ абы, и кӀуэцӀым ирехьэ ар, псым хуэдэу, и къупщхьэм хрехьэ, дагъэм хуэдэу.

¹⁹ Фащэ папщӀэ хурехъу ар, и бгым махуэ къэс щӀилъхьэ бгырыпхым хуэдэ ирехъу.

²⁰ Зиусхьэным хурегъэфащэ ар сызыгъэкъуаншэхэм – сэр щхьэкӀэ мыхъунхэр жызыӀэхэм!

²¹ Уэ, Тхьэуэ си Зиусхьэн, уи цӀэ лъапӀэм и хьэтыркӀэ фӀы къысхуэщӀэ: уи фӀыгъэшхуэмрэ уи лъагъуныгъэ мыкӀуэдыжымрэ папщӀэ сыхэшыж.

²² Сыту жыпӀэмэ сытхьэмыщкӀэщ, щыщӀагъэ сиӀэщ, си гукъеуэри ин дыдэщ.

²³ Пщыхьэщхьэ ныбжым хуэдэу сокӀуэдыж; мацӀэ зэрахуэм хуэдэу сыкърахуэкӀ.

²⁴ СызэрынэщӀым щхьэкӀэ си лъэр щӀощӀэ, си фэри зэтегъуащ.

²⁵ Сэ абыхэм щӀэнэкӀалъэ сащӀащ; я щхьэхэр зэхуагъэсыс сыкъыщалъагъукӀэ.

²⁶ Зиусхьэну си Тхьэ, къыздеӀэ, уи лъагъуныгъэ мыкӀуэдыжкӀэ сыкъегъэл,

²⁷ ауэ Уэ уи ӀэщӀагъэхэр ирещӀэ, зэхрещӀыкӀ ар Уэ зэрыпщӀар.

²⁸ Къызребг ахэр, ауэ Уэ уи нэфӀ къысщыгъахуэ; ахэр къыспэуващ, ауэ я напэр текӀащ; сэ уи ӀурыщӀэщи сыгъэгуфӀэж.

²⁹ Напэншагъэр фащэ яхурехъу сызыгъэкъуаншэхэм, емыкӀур я щыгъын ирехъу.

³⁰ Си макъ Ӏэтауэ, щӀыхь хуэсщӀынщ Зиусхьэным си жьэкӀэ, цӀыхубэм сыхэту уи щӀыхь сӀуэтэнщ,

³¹ сыту жыпӀэмэ Ар тхьэмыщкӀэм ижьырабгъукӀэ щытщ, укӀ тезылъхьэхэм ящихъумэну.