Уэрэд 106 - ХъыбарыфӀыр. ЩӀэдзапӀэр. Уэрэд ЛъапӀэхэр

106-нэ Уэрэд Тхьэм и хьэлэлагъым и щӀыхь

¹ Зиусхьэным щӀыхь хуэфщӀ – Ар фӀыщ. МыкӀуэдыжынщ Абы и лъагъуныгъэр!

² Апхуэдэу жрыреӀэ Зиусхьэным къригъэла псоми, бийхэм къаӀэщӀихыжахэм,

³ хамэ хэкухэм къришыжахэм; къуэкӀыпӀэмкӀи, къухьэпӀэмкӀи, темырымкӀи, ипщэмкӀи къыщыщӀэдзауэ.

⁴ Губгъуэ нэщӀ гъуэгуншэхэм къыщакӀухьащ абыхэм, цӀыху щыпсэу къалэ къамыгъуэтыфу.

⁵ Гъаблэм хиубыдауэ, псы ямыгъуэту, ягу кӀуэдауэ куэдрэ къэхъуащ.

⁶ Ауэ гугъуехьым хэту ахэр Зиусхьэным щелъэӀум, Абы ахэр щӀыпӀэ гузэвэгъуэм къришыжащ.

⁷ Иришэжащ ахэр гъуэгу занщӀэкӀэ зыщыпсэуну къалэм кӀуэну.

⁸ Зиусхьэным щӀыхь хурещӀ: и лъагъуныгъэ мыкӀуэдыжым, цӀыхухэм яхуищӀэ Ӏуэху щӀагъуэхэм папщӀэ,

⁹ псы хуэлӀэр псы ирегъафэ, щыгъаблэми, шхын щигъащӀэркъым.

¹⁰ Абыхэм ящыщхэр кӀыфӀымрэ ажалым и жьауэмрэ хэсащ, гукъеуэм хэту, Ӏэхъулъэхъу ярылъу;

¹¹ сыту жыпӀэмэ Тхьэм и псалъэхэм еувэлӀакъым, Ар чэнджэщэгъу ящӀыну Ӏумпэм ящӀащ,

¹² ӀуэхущӀэн хьэлъэм я гур ириудащ, джэлауэ, дэӀэпыкъуэгъу яхуэхъуни ямыгъуэту.

¹³ Ауэ гугъуехьым хэту ахэр Зиусхьэным щелъэӀум, Абы ахэр щӀыпӀэ гузэвэгъуэм къришыжащ,

¹⁴ кӀыфӀымрэ ажал жьауэмрэ къыхишыжри, я Ӏэхъулъэхъухэри икъутащ.

¹⁵ Зиусхьэным щӀыхь хурещӀ и лъагъуныгъэ мыкӀуэдыжым, цӀыхухэм яхуищӀэ Ӏуэху щӀагъуэхэм папщӀэ:

¹⁶ сыту жыпӀэмэ гъуаплъэ куэбжэхэр Абы екъутэ, гъущӀ хьэлъкъхэр зэпеуд.

¹⁷ Акъылыншэхэр гуэныхьыщӀэ гъуэгуу зытетахэм, я бзаджагъэм папщӀэ къин ящэчащ.

¹⁸ Сыт хуэдэ шхыни ягу хуэмыкӀуэу, лӀэныгъэм и куэбжэм пэблагъэ хъуащ.

¹⁹ Ауэ къиным хэту ахэр Зиусхьэным щелъэӀум, Абы ахэр щӀыпӀэ гузэвэгъуэм къришыжащ;

²⁰ и псалъэ абыхэм яхуигъакӀуэри, игъэхъужащ, бэным ящихъумащ.

²¹ Зиусхьэным щӀыхь хурещӀ мыкӀуэдыж и лъагъуныгъэм, цӀыхухэм яхуищӀа Ӏуэху щӀагъуэхэм папщӀэ!

²² ЩӀыхь къурмэнхэр Абы хурещӀ, игъэхъахэр уэрэдкӀэ иреӀуатэ!

²³ Кхъухьхэм ису, зыгуэрхэр хым техьащ, сату щӀыным щыпылъащ хышхуэм;

²⁴ хы уэрыпӀэм халъэгъуащ Зиусхьэным и ӀуэхущӀагъи и телъыджэри.

²⁵ Абы жиӀати, жьышхуэр къилъащ, абы и толъкъунхэм лъагэу заӀэтащ.

²⁶ Уэгум нэсу дэкӀуеящ, хым и щӀагъ дыдэм ехащ; къиным хэту ягухэр иткӀухьащ.

²⁷ Ахэр кӀэрэхъуащ, чэфхэм хуэдэу, Ӏэрпхъуэращ, я акъылми икӀащ.

²⁸ Ауэ къиным хэту ахэр Зиусхьэным щелъэӀум, щӀыпӀэ гузэвэгъуэм къришыжащ.

²⁹ Хы уаер игъэсабыращ Абы, толъкъунхэр етӀысэхыжащ.

³⁰ Толъкъунхэр щытӀысыжым, ягу къызэрыгъуэтыжащ абыхэм, зыщӀэхъуэпс кхъухь тедзапӀэм иришэлӀащ.

³¹ ЩӀыхьыр хурещӀ Зиусхьэным и лъагъуныгъэ мыкӀуэдыжым цӀыхухэм яхуищӀ Ӏуэху щӀагъуэхэм папщӀэ.

³² ЦӀыхухэм я зэхуэсышхуэм щӀыхьыр Абы щыхурещӀ, нэхъыжьхэм я зэхуэсым хэту, и щӀыхь иреӀуатэ!

³³ Абы псыхэр егъэгъу, псыжапӀэхэр щӀыгу гъущэ ещӀ,

³⁴ гъавэщӀапӀэм шыгъу хэз ещӀ – абы щыпсэухэм я гуэныхьхэм папщӀэ.

³⁵ Губгъуэ нэщӀыр гуэл ещӀ Абы, щӀыгу гъурхэр – псыжапӀэ.

³⁶ Абы хуэлӀэхэр ирегъэтӀысхьэри, щыпсэуну къалэр яухуэ;

³⁷ губгъуэхэр ясэ, бэ къызыпыкӀэ санэхэр щыхасэ.

³⁸ И нэфӀ абыхэм ящохуэри, мэбагъуэ, я былымми хигъэщӀыркъым.

³⁹ Ахэр нэхъ мащӀэ хъуащ, тхьэмыщкӀагъэм, егъэзыгъэ псэукӀэм, нэщхъеягъуэм хигъэщӀащ.

⁴⁰ Пщыхэм емыкӀу ярещӀэ Абы, губгъуэ нэщӀ гъуэгуншэм къыщакӀухьыну къренэ.

⁴¹ Ауэ тхьэмыщкӀэр къиным къыхешыжри, и лӀакъуэр егъэбагъуэ, мэл хъушэм хуэдэу.

⁴² Ар ялъагъури, щыпкъагъэ зиӀэхэр мэгуфӀэ, ауэ цӀыху бзаджэ псоми я жьэр яубыд.

⁴³ А Ӏуэхухэм акъылыфӀэм и нэӀэ трырегъэт, ирегупсыс цӀыхур Зиусхьэным и лъагъуныгъэ мыкӀуэдыжым.