Уэрэд 105 - ХъыбарыфӀыр. ЩӀэдзапӀэр. Уэрэд ЛъапӀэхэр

105-нэ Уэрэд Зиусхьэным щӀыхь хуэфщӀ

¹ Зиусхьэным щӀыхь хуэфщӀ: Ар фӀыщ, мыкӀуэдыжынщ Абы и лъагъуныгъэр.

² Зиусхьэным лъэкӀыныгъэшхуэ зыхэлъ и Ӏуэхухэр хэт къэзыӀуэтэфынур, Абы щӀыхьу пылъ псори хэт къэзыгъэлъэгъуэфынур?

³ НасыпыфӀэщ Тхьэм и хьэкумыр зыщымыгъупщэу, сыт щыгъуи щыпкъагъэ хэлъу зекӀуэхэр!

⁴ Уи цӀыху лъэпкъым уи гум фӀыр хуилъу, уигу сыкъэгъэкӀыж, Зиусхьэн; ахэр къиным щыхэпшыжкӀэ, уи нэӀэ сэри къыстегъэт!

⁵ Уэ къыхэпха цӀыхухэм щыӀэкӀэфӀу яӀэр слъагъуну, уи цӀыху лъэпкъым и гуфӀэгъуэр си гуфӀэгъуэу, Уэ уи уней цӀыхухэм срагъусэу уи щӀыхь къэсӀэтыну.

⁶ Дэри ди адэжьхэми гуэныхь тщӀащ, бзаджагъэ зетхьащ, мыхъуну дызекӀуащ.

⁷ Мысырым къыщыбгъэлъэгъуа Ӏуэху щӀагъуэхэр зэхащӀыкӀакъым ди адэжьхэм, уи лъагъуныгъэ мыкӀуэдыжыр ящыгъупщащ, Хы Къамылым и Ӏуфэм щыпэуващ Тхьэуэ Я Нэхъ Лъагэм.

⁸ Ауэ Езым и цӀэм и хьэтыркӀэ ахэр Абы къригъэлащ, И лъэкӀыныгъэшхуэ къаригъэлъагъун папщӀэ.

⁹ Хы Къамылым пхъашэу щепсалъэм, ар игъущӀыкӀащ; щӀыгу гъущэм тет хуэдэу, кууупӀэм ахэр зэпришащ,

¹⁰ я жагъуэгъухэм къаӀэщӀихащ, бийм и Ӏэм ящихъумащ.

¹¹ Абыхэм я бийхэм псыр къащӀэуащ, абыхэм ящыщу зы нэрыбги псэууэ къэнакъым.

¹² Абы и псалъэхэр я фӀэщ хъуащ абыхэм итӀанэ, Абы щӀыхь хуащӀащ.

¹³ Ауэ Абы къахуищӀахэр щӀэх дыдэ ящыгъупщащ, Тхьэр чэнджэщэгъу ящӀакъым, пэплъакъым Абы;

¹⁴ губгъуэ нэщӀым здитым шхыным щӀэхъуэпсурэ, Тхьэр къумым щагъэунэхуащ.

¹⁵ Зыхуейхэр къаритащ, ауэ узыфэ шынагъуэ къахуигъэкӀуащ.

¹⁶ Я увыпӀэ щыӀэу Мусэрэ Зиусхьэным и цӀыху лъапӀэу Хьэрунрэ ахэр щефыгъуэжым,

¹⁷ щӀыр зэгуэкӀри, Датан дэхуащ, Абирам и гупыр абы щӀихъумащ.

¹⁸ Абыхэм яку мафӀэ къыщызэщӀэнэри, гуэныхьыщӀэхэр мафӀэ тхъуэбзащхъуэм хисхьащ.

¹⁹ Хореб деж дыщэ танэ щагъэжри, абы щхьэщэ хуащӀащ.

²⁰ Тхьэм щӀыхь хуащӀын ямыдэу, Удзыр зыхъу вым и сурэтым щхьэщэ хуащӀащ.

²¹ Тхьэр ящыгъупщащ абыхэм – КъегъэлакӀуэу яӀэр, Ӏуэху ин дыдэхэр – Мысырым,

²² Ӏуэху щӀагъуэхэр – Хьам щӀыгум, Ӏуэху шынагъуэхэр Хы Къамылым и Ӏуфэм къащезыгъэлъэгъуар.

²³ Ахэр иукӀыну жиӀат Тхьэм, Езым къыхиха Мусэ Тхьэм и губжьыр зэщӀигъэкӀуэну, цӀыхухэр имыгъэкӀуэдыну елъэӀуу, Абы и пащхьэ имыуватэмэ.

²⁴ ЗыщӀэхъуэпс щӀыгур Ӏумпэм ящӀащ абыхэм, я фӀэщ хъуакъым Абы и псалъэр.

²⁵ Я шэтырхэм щыгъумэтӀымэурэ, едэӀуакъым Зиусхьэным и макъым.

²⁶ Абы папщӀэ Абы и Ӏэхэр ятришэщӀащ, губгъуэ нэщӀым щигъэкӀуэдыну псалъэ быдэкӀэ жиӀащ,

²⁷ абыхэм я лӀакъуэхэр цӀыху лъэпкъхэм яхигъэкӀухьу, щӀыналъэхэм щикъухьауэ ищӀыну.

²⁸ Пеор къущхьэм деж БаӀал тхьэ нэпцӀыр щагъэлъапӀэурэ, лӀахэм хуащӀа къурмэнхэр яшхащ.

²⁹ ЯщӀамкӀэ Тхьэр ягъэгубжьати, узыцӀалэ узыр абыхэм къатепсыхащ.

³⁰ Ауэ Пинэхьас къэтэджри, хьэкум щищӀым, узыр увыӀащ.

³¹ КъэкӀуэну щӀэблэхэм игъащӀэкӀэ ящымыгъупщэну Тхьэм абы щыпкъагъэ иӀэу илъытащ.

³² Мэрибэ и псым деж Тхьэр щагъэгубжьати, абыхэм папщӀэ къиныпӀэ ихуащ Мусэ.

³³ Сыту жыпӀэмэ абы игу хэщӀати, емыгупсысу къэпсэлъащ.

³⁴ Зиусхьэным унафэ яхуищӀами, хамэ лъэпкъхэр ягъэкӀуэдакъым,

³⁵ ауэ абыхэм зыхагъэкӀухьри, я Ӏуэхухэм зрагъэсащ.

³⁶ ЗыхуэӀурыщӀэ я тхьэ нэпцӀхэм я хъым ихуауэ къыщӀэкӀащ.

³⁷ Жин фӀыцӀэхэм папщӀэ я щауэхэмрэ я пщащэхэмрэ къурмэн ящӀащ.

³⁸ Ханаан и тхьэ нэпцӀхэм папщӀэ я къуэхэр, япхъухэр къурмэн ящӀурэ, лъы хейр ягъажэри, щӀыгум емыкӀу иращӀащ.

³⁹ ЯщӀамкӀэ зауфӀеижурэ, Тхьэм щыпкъагъэ хуаӀакъым я зекӀуэкӀэкӀэ.

⁴⁰ Арати, Тхьэр и цӀыху лъэпкъым хуэгубжьащ, Езым и цӀыхухэр Ӏумпэм ищӀащ;

⁴¹ хамэ лъэпкъхэм яӀэщӀилъхьащ ахэр, я жагъуэгъухэм я бжьым щӀэтыну.

⁴² Я бийхэм егъэзыгъэу яӀыгъыу, я ӀэмыщӀэ илъу псэуащ.

⁴³ Куэдрэ хишыжащ Абы ахэр; ИтӀани ерыщ хъуати, я гуэныхьхэмкӀэ загъэунэхужащ.

⁴⁴ Ауэ я джэ макъ щызэхихкӀэ, Абыхэм я тхьэмыщкӀагъуэм и нэӀэ тригъэтащ Абы.

⁴⁵ ЗэгурыӀуэныгъэу ядищӀари игу илъащ, и лъагъуныгъэ мыкӀудыжым къыхэкӀыу гущӀэгъу яхуищӀащ.

⁴⁶ Ахэр гъэр зыщӀа псоми гущӀэгъу къахуищӀыну ищӀащ.

⁴⁷ ДымыкӀуэду дыкъегъэл, Зиусхьэну ди Тхьэ, цӀыху лъэпкъхэм дакъыхэшыжи, дыугъуеиж, уи цӀэ лъапӀэм и щӀыхь къэтӀэтыну, дыпхуэарэзыну.

⁴⁸ ЩӀыхьыр ейщ Зиусхьэным, Израилым и Тхьэм, игъащӀэкӀэ! ЦӀыху лъэпкъ псоми жреӀэ: «Ӏэмин!» Зиусхьэным щӀыхьыр ейщ!